पुणे, नगर, सोलापूरात पूर्वमोसमीचा दणका 

पुणे: वादळीवारे गारपीटीसह पडणाऱ्या पूर्वमोसमी पावसाने राज्याच्या विविध भागात हजेरी लावली आहे. सोमवारी (ता.२०) सकाळपर्यंतच्या २४ तासांमध्ये पुणे, नगर, सोलापूरमधील काही तालुक्यात पुन्हा दणका दिला आहे. कोरोनाच्या टाळेबंदीमुळे शेतातच अडकून पडलेल्या पिकांचे या पावसामुळे नुकसान होत आहे.  पुणे जिल्ह्यातील इंदापूर, बारामती, दौंड, भोर, मावळ तालुक्यात रविवारी (ता.१९) दुपारनंतर वादळी वाऱ्यासह जोरदार पाऊस झाला. काही ठिकाणी गारांचा पाऊस झाल्याने इंदापूर तालुक्यात गहू, ऊस, भाजीपाला, डाळिंब, द्राक्षे, आंबा, चारा पिकांचे मोठ्या प्रमाणात नुकसान झाले. बारामतीमध्ये जोरदार वारे, गारांसह झालेल्या पावसामुळे शेतात उरली सुरली फळांची झाडे तसेच कडवळ, मका, केळी, बाजरी, कारले आदी पिकांचे मोठे नुकसान झाले. भोर तालुक्यात गहू, हरभरा, कांदा, बागायतीमधील घेवडा, भुईमूग, पालेभाज्यांना फटका बसला आहे. दौंड तालुक्यात झालेल्या हलका ते मध्यम स्वरूपाच्या पावसामुळे कलिंगड, खरबूज, द्राक्षे, आंबे, भाजीपाला पिकांचे नुकसान झाले.  नगर जिल्‍ह्यातील कर्जत, श्रीगोंदा तालुक्यात रविवारी (ता.१९) सायंकाळी जोरदार गारांसह वादळी पाऊस झाला. या पावसाचा पाचशे हेक्टरपेक्षा अधिक क्षेत्राला फटका बसला आहे. द्राक्ष, संत्रा, मोसबी फळबागांचे यामध्ये मोठे नुकसान झाले आहे. नगर जिल्ह्यामधील श्रीगोंदा तालुक्यातील शेडगावसह दहा गावांच्या परिसरात तर कर्जत तालुक्यातील बारडगाव सुद्रीक, ताजू, तळवडी, कुळधरण, जलालपूर, घोगरगाव परिसरात रविवारी रात्री जोरदार वाऱ्यांसह गारांचा पाऊस झाला. यात चारापिकांसह भाजीपाला, फळांचे नुकसान झाले.  सोलापूर जिल्ह्यात सलग दुसऱ्या दिवशी सोमवारी (ता.२०) पहाटे पावणे एकच्या सुमारास पुन्हा एकदा सोसाट्याच्या वाऱ्यासह अवकाळी पावसाने जोरदार हजेरी लावली. त्यामुळे दोन दिवसांत शेतकऱ्यांना त्याचा मोठा फटका सहन करावा लागला. जिल्ह्यात पंढरपूर, सांगोला, माढा, करमाळा, उत्तर सोलापूर, मोहोळ या भागात शनिवारी रात्री आणि रविवारी काही भागात सलगपणे पाऊस झाला. त्यानंतर सोमवारी पहाटे पावणेएकच्या सुमारास वादळवारे आणि विजेच्या कडकडाटासह पावसाने मोहोळ, बार्शी, उत्तर सोलापूर, पंढरपूर भागात हजेरी लावली. द्राक्ष, डाळिंब, केळी, कांदा, भाजीपाला पिकांना तडाखा बसला.