राज्यात ठिकठिकाणी पावसाची हजेरी

पुणे ः दोन दिवसांपासून मराठवाड्यातील अनेक भागांत पाऊस वाढला आहे. अनेक ठिकाणी मध्यम ते जोरदार पाऊस पडला. त्यातुलनेत मध्य महाराष्ट्र, कोकण व विदर्भात पावसाचा जोर कमी असला तरी बहुतांशी भागात हलका ते मध्यम स्वरूपाचा पाऊस पडला. मंगळवारी (ता.१५) सकाळी आठ वाजेपर्यंत नांदेड जिल्ह्यातील देवणी येथे ८४ मिलिमीटर पाऊस पडला. त्यामुळे या भागात शेतकऱ्यांची कामे खोळंबल्याची स्थिती आहे.   राज्यात बदलत असलेल्या वातावरणामुळे अनेक भागांत कमीअधिक स्वरूपात पाऊस पडत आहे. कोकणात ठाणे, रायगड, रत्नागिरी, सिंधुदुर्ग जिल्ह्यात पावसाच्या उघडिपीसह काही ठिकाणी मध्यम स्वरूपाचा पाऊस पडत आहे. सिंधुदुर्गामधील मालवण येथे सर्वाधिक पाऊस पडला असून इतर भागातही बऱ्यापैकी पावसाच्या सरी बरसल्या. त्यामुळे वाढीच्या अवस्थेत असलेल्या भात पिकांना दिलासा मिळत असून पिके चांगलीच तरारली आहेत. मध्य महाराष्ट्रातही ढगाळ हवामानासह अधूनमधून ऊन पडत आहे. नगर, सोलापूर, पुणे जिल्ह्यात तुरळक ठिकाणी जोरदार पाऊस झाला. तर इंदापूर, माढा, माळशिरस परिसरात पावसाने चांगलीच दाणादाण उडवली. त्यामुळे ओढे, नाले व शेतातून भरून वाहत होते. नाशिक, सातारा, सांगली, कोल्हापूर, खानदेशातील धुळे, जळगाव, नंदुरबार परिसरात पावसाची उघडीप होती. मराठवाड्यातील दुष्काळी ओळख असलेल्या बीड, लातूर, उस्नानाबाद, नांदेड, परभणी जिल्ह्यात पावसाने चांगलीच हजेरी लावली. या जिल्ह्यातील सर्वच भागात हलका ते मध्यम पाऊस पडल्याने दुसऱ्या दिवशी शेतात पाणी साचल्याने नुकसान होण्याची भिती शेतकऱ्यांना होती. देवणीपाठोपाठ नांदेड, कंधार, चाकूर, अर्धापूर परिसरातही जोरदार पाऊस पडला. विदर्भात चंद्रपूर, गडचिरोली, नागपूर, वर्धा जिल्ह्यात तुरळक ठिकाणी मध्यम पाऊस पडला. तर अनेक भागात पावसाच्या हलक्या सरीचा शिडकावा झाला. त्यामुळे पिकांना दिलासा मिळाला असून अनेक ठिकाणी पिकांची काढणी वेगाने सुरू आहे.

मंगळवारी (ता.१५) सकाळी आठ वाजेपर्यत झालेला पाऊस, मिलिमीटरमध्ये ः (स्त्रोत, हवामान विभाग): कोकण : खेड २७, लांजा २७, रत्नागिरी ४०.९, देवगड ४८, कणकवली ३३, कुडाळ २८, मालवण ५६, वैभववाडी २७, अंबरनाथ ३२, ठाणे ३२, उल्हासनगर ३०. मध्य महाराष्ट्र ः जामखेड ४७, पाथर्डी ४०, शेवगाव २२, इंदापूर ७१.२, बार्शी ३५, जेऊर ६०, माढा ७०.४, माळशिरस ५१, मोहोळ २०.  मराठवाडा : आष्टी ४०, पाटोदा ४५, अहमदपूर ३३, चाकूर ५०, देवणी ८४, लातूर ३०, रेणापूर ४३, शिरूर अनंतपाळ ४०, अर्धापूर ५४, बिलोली ४०, देगलूर ४२, धर्माबाद ३०, कंधार ५३, मुखेड ४०, नांदेड ६७.४, भूम ४१, उस्मानाबाद ६७.४, परांडा ३०, वाशी ४०, पालम ५१,  विदर्भ : आर्वी २८.२, वर्धा २६.५, नेर २०.२.