राज्यात पावसाची उघडीप; उकाड्यात वाढ

पुणे: राज्यात गेल्या काही दिवसांपासून पावसाने उघडीप दिली आहे. ढगाळ हवामान असले, तरी ऊन पडत असल्याने तापमानात वाढ होऊन, उकड्यातही वाढ झाली आहे. बुधवारपर्यंत (ता. १) राज्यात तुरळक ठिकाणी पावसाचा अंदाज असल्याचे हवामान विभागातर्फे सांगण्यात आले. जवळपास आठवडाभर पावसाची उघडीप राहणार असल्याने कमाल तापमानात आणखी वाढ होण्याची शक्यता आहे.  मॉन्सूनच्या पावसामुळे राज्यातील कमाल व किमान तापमानात घट झाल्याने गारठा वाढू लागला होता. मात्र, या आठवड्याच्या सुरवातीपासूनच राज्यात पावसाने उघडीप दिली आहे. राज्यात तापमानाचा पारा २७ अंशांच्या पुढे गेला असून, शनिवारी सकाळपर्यंतच्या २४ तासांमध्ये विदर्भातील चंद्रपूर येथे उच्चांकी ३१.४ अंश सेल्सिअस तापमानाची नोंद झाली होती. जळगाव, डहाणू, परभणी, नांदेड येथे तापमान ३० अंशांपेक्षा अधिक तापमानाची नोंद झाली. शनिवारी दुपारनंतर उन्हाचा चटका जाणवत हाेता. उकाड्यातही वाढ झाली होती.  पश्‍चिम बंगाल आणि परिसरावर समुद्र सपाटीपासून ७.६ किलोमीटर उंचीपर्यंत चक्राकार वारे वाहत आहेत. या वाऱ्यांच्या प्रभावामुळे सोमवारपर्यंत (ता. ३०) या भागात कमी दाबाचे क्षेत्र निर्माण होण्याचे संकेत आहे. बुधवारपर्यंत (ता.१) कोकणात काही ठिकाणी, तर उर्वरित महाराष्ट्रात तुरळक ठिकाणी हलक्या सरींचा अंदाज अाहे. शनिवारी (ता. २८) सकाळपर्यंतच्या २४ तासांमध्ये कोकण, मध्य महाराष्ट्रात तुरळक ठिकाणी पावसाने हजेरी लावली असून, उर्वरित राज्यात कोरडे हवामान होते. कोकणातील शिरगाव येथे ५५ मिलिमीटर, खेड २१, धामनंद २२, सवंडल ५५, कुंभवडे ३३; तर मध्य महाराष्ट्रातील शेंडी येथे २० मिलिमीटर, हेळवाक ३६, उब्रंज ३०, तापोळा ५८, लामज ७५, वाडी-रत्नागिरी २२, बाजार २१, करंजफेन ३३, आंबा ६३, साळवण ५७, गवसे येथे २४ मिलिमीटर पावसाची नोंद झाल्याचे कृषी विभागातर्फे सांगण्यात आले.  शनिवारी (ता.२८) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे २६.४, नगर २७.४, जळगाव ३०.०, कोल्हापूर २४.९, महाबळेश्वर १९.१, मालेगाव २९.४, नाशिक २७.०, सातारा २५.१, सोलापूर २९.५, मुंबई २८.५, अलिबाग २८.३, रत्नागिरी २८.३, डहाणू ३१.०, आैरंगाबाद २७.८, परभणी ३०.४, नांदेड ३१.०, अकोला २९.९, अमरावती २८.४, बुलडाणा २७.२, ब्रह्मपुरी २९.९, चंद्रपूर ३१.४, गोंदिया २८.५, नागपूर २९.३, वर्धा २९.४, यवतमाळ २८.५.