राज्यात पावसाची उघडीप; हलक्या सरींचाच अंदाज

पुणे : कोकण, मध्य महाराष्ट्र, घाटमाथ्यावर धो-धो कोसळणाऱ्या पावसाने विश्रांती घेतली आहे. शनिवारी (ता. १०) सकाळपासून राज्यात पावसाने उघडीप दिली आहे. अनेक भागांत दोन आठवड्यांनतर सूर्यदर्शन झाले आहे. शनिवारी दिवसभर ऊन, सावल्यांच्या खेळात हलक्या सरी पडल्या. आज (ता. ११) राज्यात मुख्यत: पावसाची उघडीप राहण्याची शक्यता आहे. कोकणात तुरळक ठिकाणी जोरदार सरी तर उर्वरित राज्यात हलक्या सरींचा अंदाज वर्तविण्यात आला आहे.  बंगालच्या उपसागरात एकामागून एक तयार होत असलेली कमी दाब क्षेत्रे, त्यास पूरक असलेला मॉन्सूनचा आस या पोषक स्थितीमुळे मॉन्सून सक्रिय झाला. सुमारे दोन आठवडे कोकण, मध्य महाराष्ट्र आणि घाटमाथ्यावर पावसाने दणका दिला, तर अनेक ठिकाणी सातत्याने अतिवृष्टी झाली. जुलै महिन्यात तळाशी असलेली धरणे गेल्या पंधरा दिवसांमध्ये पाणलोट क्षेत्रात झालेल्या दमदार पावसाने ओसंडून वाहिली. कोल्हापूर, सांगली, सातारा, नाशिक, औरंगाबाद, पुणे, सोलापूर जिल्ह्यात अभुतपूर्व पूरस्थिती निर्माण झाली.  शनिवारी (ता. १०) गुजरात आणि राजस्थानमध्ये सक्रिय असलेल्या कमी दाबाच्या प्रणालीमुळे या भागात पावसाचा जोर वाढला आहे. मात्र राज्यात दोन दिवसांपासून पावसाचा जोर ओसरत गेला. शनिवारी राज्याच्या अनेक भागात पावसाने उघडीप दिली आहे. धरणांमधील आवक कमी झाल्याने पाण्याचा विसर्गही कमी करण्यात येत आहे. त्यामुळे नद्यांची पाणी पातळी कमी होऊ लागली असून, पूरस्थिती हळूहळू पूर्वपदावर येत आहे.  दरम्यान सोमवारपर्यंत (ता. १२) बंगालच्या उपसागरात नव्याने कमी दाबाचे क्षेत्र तयार होण्याचे संकेत आहे. या कमी दाब क्षेत्राची तीव्रता वाढून ओडीशा, झारखंड, मध्य प्रदेश, छत्तीसगडसह पूर्व भारतात मुसळधार पाऊस पडण्याचा अंदाज आहे. मंगळवार आणि बुधवारी केरळमध्ये पावसाचा जोर वाढणार असून, कोकणातही तुरळक ठिकाणी मुसळधार पाऊस पडण्याची शक्यता आहे.   

शनिवारी (ता. १०) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) :  कोकण : वैभववाडी १००, माथेरान, राजापूर प्रत्येकी ८०, खालापूर, कुडाळ प्रत्येकी ७०, भिरा ६०, जव्हार, मंडगणगड, मोखेडा, शहापूर प्रत्येकी ५०, देवगड, दोडामार्ग, कणकवली, संगमेश्वर, देवरूख, सावंतवाडी प्रत्येकी ४०.  मध्य महाराष्ट्र : आजरा १९०, राधानगरी १८०, महाबळेश्वर १७०, त्र्यंबकेश्वर १५०, पौड १४०, चंदगड, गारगोटी ११०, अक्कलकुवा, इगतपुरी, शिरपूर १००, नंदूरबार, पन्हाळा, पाटण प्रत्येकी ८०, भोर, गडहिंग्लज, जावळीमेढा, शाहूवाडी प्रत्येकी ७०, कागल, लोणावळा, पेठ, तळोदा प्रत्येकी ६०, घोडगाव, धाडगाव, शहादा, सुरगाणा प्रत्येकी ५०, हर्सुल, शिराळा, सिंदखेडा प्रत्येकी ४०.  मराठवाडा : अर्धापूर, हिमायतनगर, उमरी प्रत्येकी १०. विदर्भ : अर्जनी मोरगाव ३०, लाखंदूर, धारणी, कोर्ची, रामटेक, कुरखेडा, नागभिड, देसाईगंज, चांदूरबाजार प्रत्येकी २०.  घाटमाथा : शिरगाव १७०, ताम्हिणी, दावडी १२०, आंबोणे १००, डुंगरवाडी ८०, वाणगाव ७०, शिरोटा ६०, कोयना पोफळी प्रत्येकी ४०.