कोकणात पावसाचा जोर ओसरला 

पुणे : कोकणात धुमाकूळ घातलेल्या पावसाचा जोर काहीसा ओसरला आहे. तुरळक ठिकाणी जोरदार पाऊस होत आहे. रायगडमधील माथेरान येथे ११६ मिलिमीटर पाऊस झाला. नद्यांतील पाणीपातळी काही प्रमाणात कमी झाली असली तरी धरणांत आवक सुरू आहे. मराठवाडा, विदर्भात काही ठिकाणी तुरळक सरी पडत असल्या अनेक भागांत पावसाने उघडीप दिली. 

गेल्या आठवड्यापासून कोकणातील रायगड, रत्नागिरी, सिंधुदुर्ग जिल्ह्यांतील बहुतांशी भागात मध्यम ते जोरदार स्वरूपाचा पाऊस पडत आहे. माथेरान, सावंतवाडी वगळता उर्वरित भागात शंभर मिलिमीटरपेक्षा कमी पाऊस झाला आहे. अनेक ठिकाणी हलका ते मध्यम स्वरूपाचा पाऊस झाल्याने धरणातील वाढलेली पातळी कमी झाली आहे. मध्य महाराष्ट्रातील कोल्हापूर, पुणे, नाशिक, नगर, सातारा जिल्ह्याच्या पश्‍चिमेकडील भागात पावसाचा सरी कोसळत आहेत. अनेक भागांत हलका ते मध्यम पाऊस पडत आहे. गगनबावडा येथे ११२ मिलिमीटर पाऊस पडला. तर चंदगड, राधानगरी, शाहूवाडी, लोणावळा, महाबळेश्‍वर येथेही पावसाच्या जोरदार सरी पडल्या. 

राज्यात रविवारी (ता. २०) सकाळी आठ वाजेपर्यंत मंडळनिहाय पाऊस (मिलिमीटरमध्ये) : स्रोत ः हवामान विभाग  कोकण : जव्हार ३२, मोखेडा ४२.६, विक्रमगड ५०.५, कर्जत ४३.६, खालापूर ४९, महाड ६९, माथेरान ११६, म्हसळा ३५, पनवेल ५९.४, पेण ४५, पोलादपूर ६६, श्रीवर्धन ५४, सुधागड पाली ८०, चिपळूण ४६, दापोली ४३, गुहागर ५५, खेड ५५, मंडणगड ८९, राजापूर ४७, संगमेश्‍वर ३२, देवगड ३८, दोडामार्ग ९५, कणकवली ६५, कुडाळ ६०, मालवण ४५, सावंतवाडी १००, वैभववाडी ८०, वेंगुर्ला ४८.२, शहापूर ३४, उल्हासनगर ३४. 

मध्य महाराष्ट्र : आजरा ४६, चंदगड ८७, गडहिंग्लज ३४, गगनबावडा ११२, गारगोटी ४८, हातकणंगले ३४, पन्हाळा ४८, राधानगरी ६४, शाहूवाडी ५३, हर्सूल ५१.४, त्र्यंबकेश्‍वर ६१, लोणावळा कृषी ८६.१, शिरूर ३०, वडगाव मावळ ३६, महाबळेश्‍वर ८९.