पावसाचा जोर वाढण्याची शक्यता  

पुणे ः  बंगालच्या उपसागरात कमी दाबाचे क्षेत्र सक्रिय होत असल्याने राज्यात पावसासाठी पोषक वातावरण आहे. कोकण व मध्य महाराष्ट्रातील अनेक भागात ढगाळ हवामान राहणार आहे. तर, पुढील चार ते पाच दिवस कोकण व घाटमाथ्यावर मुसळधार तर मध्य महाराष्ट्र, मराठवाडा व विदर्भात मध्यम ते जोरदार स्वरूपाचा पाऊस पडण्याची शक्यता हवामान विभागाच्या सूत्रांनी वर्तविली आहे. गेल्या दोन ते तीन दिवसांपासून राजस्थानचा दक्षिण भाग ते उत्तर गुजरात या दरम्यान चक्राकार वाऱ्यांची स्थिती कायम आहे. याशिवाय उत्तर भारतात मॉन्सनचा आस असलेला कमी दाबाचा पट्टा गंगानगर, पिलानी ते मेघालयपर्यंत कायम आहे. यामुळे राज्यात ढगाळ वातावरणाची स्थिती असून राज्यात तुरळक ठिकाणी हलका ते मध्यम स्वरूपाचा पाऊस पडला. रविवारी (ता.२) सकाळी आठवाजेपर्यंतच्या चोवीस तासांत सिंधुदुर्ग जिल्ह्यातील वेंगुर्ला येथे ५४.४ मिलिमीटर पाऊस पडल्याची नोंद झाली आहे. कोकणातील बहुतांशी भागात ढगाळ हवामान असून सावंतवाडी, मालवण, दापोली, राजापूर, हर्णे, कणकवली या भागात मध्यम स्वरूपाचा तर अनेक भागात पावसाचा शिडकावा झाला. मध्य महाराष्ट्रातही घाटमाथ्यावर तुरळक ठिकाणी हलका पाऊस पडला. मराठवाड्यातील नांदेड जिल्ह्यातील लोहा येथे ४३ मिलिमीटर पाऊस पडला असून दुष्काळी असलेल्या बीडमध्ये ४० मिलिमीटर पाऊस पडला. विदर्भात अनेक ठिकाणी मध्यम स्वरूपाचा पाऊस पडला. रविवारी (ता.२) सकाळी आठ वाजेपर्यतच्या चोवीस तासात झालेला पाऊस (मिलिमीटर)  कोकण : भिरा १६, दापोली ३८, गुहागर १६, हर्णे २३.८, खेड २०, लांजा १५, मंडणगड १५, राजापूर २४, रत्नागिरी १३.१, देवगड २२, दोडामार्ग २४, कणकवली २६, कुडाळ १६, मालवण २५, सावंतवाडी ३२, वैभववाडी १६, वेंगुर्ला ५४.४. मध्य महाराष्ट्र ः  गगनबावडा २६, इगतपुरी १९, मुल्हेर १२, सुरगाणा १५.३, कवठेमहांकाळ १७.२, महाबळेश्वर २५.६. मराठवाडा ः औरंगाबाद १३.२, बीड ४०, जाफ्राबाद २३, हादगाव २०, लोहा ४३, मुदखेड १५, नांदेड ११, उमरी १६, उमरगा ३०, पालम २५, पाथरी ९. विदर्भ : लाखंदूर ३८.२, पवनी १८.६, साकोळी १९.८, ब्रह्मपुरी २१, चिमूर २९.१, गोंडपिंपरी १०, धानोरा २३.९, एटापल्ली, आमगाव २१.१, सडक अर्जुनी ९.५, भिवापूर १५.८, मौदा ८.४, नागपूर २३, सावनेर २१.८, उमरेर ९.७, उमेरखेड ११.३.