पावसाचा जोर कायम राहणार 

पुणे: गुजरातच्या दक्षिण भागात चक्राकार वाऱ्यांची स्थिती असल्याने कोकण, मध्य महाराष्ट्र व विदर्भात पावसासाठी पोषक वातावरण तयार झाले आहे. त्यामुळे पुढील चार ते पाच दिवस कोकण, घाटमाथा, मध्य महाराष्ट्र आणि विदर्भात जोरदार वाऱ्यासह पावसाचा जोर वाढणार आहे. मराठवाड्यात मात्र जोर कमी राहणार असल्याचा अंदाज हवामान विभागाच्या सूत्रांनी दिली आहे. 

बंगाल उपसागराचा पश्चिम मध्य भाग ते बिहार उत्तर भागात कमी दाबाचा पट्टा असून तो झारखंड, पश्चिम बंगाल आणि बंगाल उपसागराचा वायव्य भागापर्यंत आहे. समुद्रसपाटीपासून हा पट्टा ३.१ किलोमीटर उंचीवर आहे. तसेच पश्चिम बंगालच्या पश्चिम मध्य भाग व परिसरात चक्राकार वाऱ्याची स्थिती आहे. ही स्थिती ओडिशा, आंध्र प्रदेश या भागापर्यंत असून बंगालच्या उपसागराचा वायव्य भाग ते ओडिशाच्या पश्चिम भागादरम्यान दरम्यान कमी दाबाचे क्षेत्र आहे. त्याचे चक्राकार वाऱ्यांमध्ये रूपांतर होण्याची शक्यता आहे. समुद्रसपाटीपासून ही स्थिती ७.६ किलोमीटर उंचीवर असेल. 

उत्तर भारतात दाखल झालेल्या मॉन्सूनचा पट्टा फिरोजपूर, कर्नाल, ग्वालियर, सतना, अंबिकापूर, छईबासा ते बंगाल उपसागराच्या वायव्य भागापर्यंत व ओडिशाचा उत्तर भाग आणि पश्चिम बंगाल या दरम्यान आहे. ही स्थिती समुद्रसपाटीपासून ९०० मीटर उंचीवर आहे. त्यामुळे पुढील काही दिवस चांगल्या पावसासाठी पोषक वातावरण राहणार आहे. 

कोकणात तुरळक ठिकाणी जोरदार पाऊस पडेल. तर मध्य महाराष्ट्राच्या घाटमाथ्यावर तुरळक ठिकाणी मुसळधार पाऊस पडण्याची शक्यता आहे. कोकण किनारपट्टीवर सोसाट्याचा वारा वाहण्याची शक्यता असून ही स्थिती आज आणि उद्या दिवस राहील. रविवारी (ता.१६) कोकण, मध्य महाराष्ट्रात जोरदार तर विदर्भात व मराठवाड्यात तुरळक ठिकाणी मुसळधार पाऊस पडण्याची शक्यता आहे. पुणे परिसरातही मंगळवारपर्यंत (ता.१८) हलका ते मध्यम स्वरूपाचा पाऊस पडेल.