परभणी : माती, समाज आणि देशाचे ऋण फेडण्यासाठी कलावंतांनी काम करावे. पारितोषिक हे कलावंताचे अंतिम ध्येय नसते. विद्यार्थी, कलावंतांनी आपल्या कलेचा उपयोग देशासाठी करावा, असे आवाहन प्रसिद्ध कवी प्रा. इंद्रजित भालेराव यांनी रविवारी (ता. ५) येथे केले.
वसंतराव नाईक मराठवाडा कृषी विद्यापीठामध्ये आयोजित १५ व्या महाराष्ट्र राज्य आंतरविद्यापीठ युवक महोत्सव ‘इंद्रधनुष्य २०१७’चे उद्‍घाटन आमदार डाॅ. राहुल पाटील यांच्या हस्ते झाले. या वेळी प्रा. भालेराव बोलत होते.
कुलगुरू डाॅ. बी. व्यंकटेश्वरलू अध्यक्षस्थानी होते. शिक्षण संचालक डाॅ. व्ही. डी. पाटील, विस्तार शिक्षण संचालक डाॅ. पी. जी. इंगोले, कुलसचिव डाॅ. गजेंद्र लोंढे, डाॅ. अशोक कडाळे, विद्यार्थी कल्याण अधिकारी डाॅ. महेश देशमुख, विनोद गायकवाड, डाॅ. पी. आर. शिवपुजे, डाॅ. अजय देशमुख, डाॅ. अनिल पाटील आदी उपस्थित होते.
यावेळी प्रा. इंद्रजित भालेराव यांनी शेतकरी जीवनावरील... शेतामंधी माझी खोप, तिला बोराटीची झाप, तिथं राबतो, कष्टतो माझा शेतकरी बाप आणि शेतकऱ्यांनी आत्महत्या करू नये म्हणून लिहिलेली शिक बाबा शिक लढायला शिक, कुणब्याच्या पोरा आता लढायला शिक या सर्वाधिक गाजलेल्या कविता सादर केल्या. त्यास विद्यार्थ्यांनी उत्स्फूर्त दाद दिली.
यावेळी आमदार पाटील म्हणाले, मराठवाड्यातील विद्यार्थ्यांमध्ये प्रचंड ऊर्जा आहे. त्यांच्यातील सुप्त कलागुणांना चालना देण्यासाठी युवक महोत्सवाच्या माध्यमातून व्यासपीठ मिळते.
डाॅ. व्यंकटेश्वरलू म्हणाले, स्मार्ट फोनच्या युगात व्यक्ती आत्मकेंद्री होत आहेत. देशातील अनेक लोककला प्रकार लुप्त होण्याच्या मार्गावर आहेत. या कलाप्रकाराचे संवर्धन विद्यार्थ्यांतील युवक कलावंतांनी करणे आवश्यक आहे. यावेळी ऐश्वर्या डावरे हिने गणेश वंदना तर माधुरी मीना हिने राजस्थानी लोकनृत्य सादर केले. प्रास्ताविक डाॅ. देशमुख यांनी केले तर डाॅ. व्ही. डी. पाटील यांनी स्वागत केले.
उद्‍घाटनापूर्वी काढण्यात आलेल्या शोभायात्रेत विविध विद्यापीठांच्या संघांनी कला प्रकार सादर केले. गुरुवार (ता. ९) पर्यंत चालणाऱ्या युवक महोत्सवामध्ये संगीत, नृत्य, साहित्य, रंगमंचीय आणि ललित कला अशा विभागांतील विविध कलाप्रकारांमध्ये विद्यार्थी कला सादर करणार आहेत. या महोत्सवामध्ये राज्‍यातील कृषी व अकृषी मिळून २० विद्यापीठांतील जवळपास एक हजार स्‍पर्धक विद्यार्थी सहभागी झाले आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.