खरीप मळण्यांना पावसाचा फटका

कोल्हापूर : गेल्या काही दिवसांपासून जिल्ह्यात दररोज पाऊस सुरू असल्याने याचा फटका खरिपाच्या मळण्यांना बसत आहे. दिवसभर कडक ऊन असल्याने शेतकरी खरीप पिकांची कापणी करून मळणी करण्याच्या तयारीत असताना चार वाजल्यापासून जोरदार पाऊस सुरू होत असल्याने कापलेल्या पिकांचे नुकसान होत आहे. 

पिकांची प्रत ढासळत असल्याने उत्पादनातही घट येत असल्याचे चित्र शिवारात आहे. चांगली आणि सुपीक शेती असणाऱ्या या गावांमध्ये पुरात न सापडताही अतिवृष्टीमुळे शेतात साचलेल्या पाणीच भुईमूग, सोयाबीन आणि भात पिकाला मारक ठरले आहे. कांही ठिकाणी सोयाबीन मळणीचे काम सुरू आहे. 

अतिवृष्टीमुळे गारठून गेलेल्या सोयाबीनच्या शेंगा परिपक्व झाल्या नाहीत. सतत सुरू असणाऱ्या अतिवृष्टीमुळे वातावरणात उब मिळाली नसल्याने शेंगाची वाढही खुंटली. शेताच्या सऱ्यांमध्ये सतत पाणी राहून चिखल झाल्यामुळे भुईमूगाच्या शेगांची संख्याही खूप कमी झाली आहे. भुईमुगाच्या एका-एका जाळीमध्ये ३० ते ३५ शेंगा असतात. या वेळी मात्र या शेंगामध्ये घट होऊन एका जाळीला केवळ १० ते १२ आणि त्याची जाडीही कमी झाली आहे.

पुरातून सावरलेल्या शेतकऱ्यांना आता चार महिन्यांपूर्वी पेरून उगवलेल्या पिकांची चिंता लागली आहे. जे पिके चांगली आहेत. पुरामुळे आणि अतिवृष्टीमुळे काहीही झाले नाही, असे समजून पंचनामे केले नव्हते, आता याच पिकामधील उत्पादन निघाताना शेतकऱ्यांचा भ्रमनिरास झाला आहे.

यावर्षी जिल्ह्यात उसासह भुईमूग, सोयाबीन आणि भाताच्या पिकातही मोठी घट झाली आहे. सायंकाळी एक दोन तास जोरदार पाऊस होतो. यामुळे सकाळी शेताचे तळे झालेले असते. या परिस्थितीत काढणीला आलेले भात, सोयाबीन पीक काढायचे कसे या चिंतेत आहेत. पाणी साचत असल्याने पीक काढणी नाइलाजास्तव पुढे ढकलावी लागत असल्याचे शेतकऱ्यांनी सांगितले.