खानदेशात संततधार पाऊस

जळगाव  ः खानदेशात बुधवारी (ता. २५) रात्री अनेक भागांत मध्यम ते जोरदार स्वरूपाचा पाऊस झाला. यामुळे नदी, नाल्यांना पुन्हा एकदा पूर आला आहे. चाळीसगाव (जि. जळगाव) नजीकच्या गिरणा धरणातून पाण्याचा विसर्ग गुरुवारी (ता. २६) सकाळी वाढविण्यात आला. या धरणातून सकाळी १० हजार क्‍युसेक पाण्याचा विसर्ग सुरू होता.  गेल्या २४ तासात धडगाव व अक्कलकुवा (जि. नंदुरबार) येथील काही भागांत अतिवृष्टी झाल्याची माहिती आहे. या भागातील उदय नदीला मोठा पूर आला आहे. धुळे जिल्ह्यात शिरपूर, शिंदखेडा, धुळे, साक्री येथे मध्यम स्वरूपाचा पाऊस झाला. साक्री येथे सलग दोन ते तीन तास संततधार पाऊस सुरू होता. जळगाव जिल्ह्यात भुसावळ, बोदवड, मुक्ताईनगर, जामनेर, एरंडोल, पाचोरा, जळगाव, धरणगाव, चोपडा, यावल या भागांत संततधार पाऊस झाला. गेल्या २४ तासांत कुठेही अतिवृष्टी झालेली नसल्याची माहिती मिळाली.  गिरणा नदीवरील गिरणा धरणाचे लाभक्षेत्र गुजरातमधील डांग जिल्ह्यानजीकचे सापुतारा व नाशिकमधील मालेगाव, दिंडोरी आदी भागांत आहे. या भागात जोरदार पाऊस झाल्याने नाशिक जिल्ह्यातील या नदीवरील हरणबारी, चणकापूर, केळझर या प्रकल्पांमधून पाण्याचा मोठा विसर्ग गिरणा धरणाकडे सोडण्यात आला. गिरणा धरणातील आवक गुरुवारी पहाटे वाढली. या धरणातून गुरवारी सकाळी १० हजार क्‍युसेक पाण्याचा विसर्ग सुरू असून नदीकाठच्या गावांना सतर्कतेचा इशारा दिला आहे. या पावसामुळे उडदासह कापूस पिकाचे नुकसान झाले आहे. सखल भागात पाणी साचल्याने चोपडा, जळगाव, अमळनेर, पाचोरा आदी भागांतील काळ्या कसदार जमिनीत कापूस पिकाला फटका बसत आहे. मूळकूज रोग कापूस पिकात वाढण्याची भीती आहे.  गेल्या २४ तासांतील पाऊस (गुरुवारी सकाळी आठपर्यंत, मिलिमीटरमध्ये) ः जळगाव ः एरंडोल १८, पाचोरा १४, धरणगाव १७, जळगाव २४. धुळे ः शिरपूर २१, शिंदखेडा १८.