खानदेशात पाऊस सरासरीच्या उंबरठ्यावर

जळगाव : मागील आठवडाभरापासून खानदेशात अधूनमधून बरसणाऱ्या पावसामुळे जलसाठे मुबलक झाले आहेत. याच वेळी पाऊस शंभरी किंवा सरासरी गाठेल, असे संकेतही मिळत असल्याची स्थिती आहे.  

गेल्या २४ तासांत (बुधवारी (ता. ११) सकाळी आठपर्यंत) खानदेशात सर्वत्र कमी अधिक पाऊस झाला. कुठेही अतिवृष्टी झाली नसली, तरी सततच्या पावसामुळे टक्केवारी वाढली आहे. जळगाव जिल्ह्यात सरासरीच्या ९७ टक्के, धुळ्यात ९५ टक्के, तर नंदुरबारात १६५ टक्‍क्‍यांवर पाऊस झाला आहे. या २४ तासांतील पावसात अनेक तालुक्‍यांमध्ये पावसाने शंभरी गाठली आहे. त्यात जळगाव जिल्ह्यातील यावल, रावेर, मुक्ताईनगर, अमळनेर, चोपडा, भुसावळ, एरंडोल, धुळ्यातील साक्री, शिरपूर, नंदुरबारमधील नवापूर, तळोदा, शहादा, अक्कलकुवा, धडगाव, नंदुरबार या तालुक्‍यांमध्ये १०० टक्के पाऊस झाला. या आठवड्यातील पावसात जळगाव जिल्ह्यातील महत्त्वाची गिरणा नदी दुथडी भरून वाहू लागली आहे. 

मागील वर्षी १० सप्टेंबरपर्यंत जळगाव जिल्ह्यात फक्त एकूण ४२७.३ मिलिमीटर पाऊस झाला होता. यंदा १० सप्टेंबरअखेर ६२५.२ मिलिमीटर पाऊस झाला. मागील दोन दिवस कुठेही अतिजोरदार किंवा मुसळधार पाऊस झाला नाही. तरी मध्यम स्वरूपाचा पाऊस झाल्याने जलसाठे वाढले आहेत. धुळे जिल्ह्यातील कनोली, सोनवद या अनेक वर्षे कोरड्या असलेल्या प्रकल्पातील साठा वाढला आहे. 

शिरपूर (जि. धुळे) तालुक्‍यातील अनेर नदीला पुन्हा एकदा पूरस्थिती निर्माण झाली आहे. खानदेशात मंगळवारी (ता. १०) दिवसभर अधूनमधून हलका व मध्यम स्वरूपाचा पाऊस झाला. जळगाव, धरणगाव, एरंडोल भागांत सायंकाळी मध्यम स्वरूपाचा पाऊस झाला. धुळे, शिंदखेडा, साक्री, शिरपूर येथेही पावसाने हजेरी लावली. रात्रीदेखील अधूनमधून पावसाचा शिडकावा सुरू होता. 

बुधवारी सकाळी अकरापर्यंत  २४ तासांतील पाऊस (मिमी)