जत तालुक्याच्या पूर्व भागात पावसाची दडी

सांगली : जत तालुक्याच्या पूर्व भागातील संख, दरीबडची, माडग्याळ, जाडरबोबलाद उटगी यांसह २१ गावांत परतीच्या पावसाने दडी मारली आहे. या भागातील पाणीटंचाई आणि चाराटंचाई दिवसेंदिवस वाढली आहे. पाण्याची पातळी ८०० ते ९०० फुटांपर्यंत गेली आहे. या भागातील शेतकरी मोठ्या पावसाच्या प्रतीक्षेत आहे.

पूर्व भागातील संख, दरीबडची, माडग्याळ, जाडरबोबलाद, उटगी, लमाणतांडा, सोन्याळ, खैराव, टोणेवाडी, मायथळ, व्हसपेट, आसंगी, गोंधळेवाडी, तिल्याळ, कुलाळवाडी, राजोबाचीवाडी यासह अनेक गावांत हलक्या स्वरूपाचा पाऊस पडला आहे. मोठा पाऊस झाला नसल्याने दिवसेंदिवस टंचाई वाढू लागली आहे.  गावातील विहिरी, बंधारे तलाव कोरडे पडले आहेत. कुपनलिकेतील पाणी पातळी कमालीची घटली आहे. सध्या गावात पाण्याचे टॅंकर सुरू आहेत. परंतु, शेतीला पाणी नसल्याने पाणी कोठून आणायचे असा प्रश्न शेतकऱ्यांसमोर पडला आहे. सुरवातीपासून पाऊस नसल्याने खरीप वाया गेलाच आहे. आता त्यापाठोपाठ रब्बीही वाया जाणार असल्याचे शेतकऱ्यांनी सांगितले. या भागातील सुमारे चार ते पाच गावांना पाणीपुरवठा करणारा दरीबडची तलाव कोरडाच आहे. त्यामुळे शेतकऱ्यांच्यावर मोठे संकट निर्माण झाले आहे. 

द्राक्ष बागा संकटात

पूर्व भागातील सिद्धनाथ, जालिहाळ खर्दु या दोन गावांत एक हजार एकर द्राक्षाचे क्षेत्र आहे. याच ठिकाणी दर्जेदार बेदाणा तयार केला जातो. ऑक्टोबर महिन्यात छाटणी केली जाते. परंतु, पुरेसे पाणी नसल्याने शेतकऱ्यांनी ऑक्टोबर छाटणी लांबणीवर गेली आहे.

चाऱ्याचा प्रश्न गंभीर

शेती व्यवसायाबरोबर शेतकरी पशुपालनाचा व्यवसाय करत आहेत. परंतु, पाऊस न झाल्याने खरीप हंगाम पूर्ण वाया गेला आहे. पाणी नसल्याने शेतकऱ्यांनी चारा पिकाची पेरणी केली नाही. त्यामुळे दुधाच्या संकलनात घट झाली आहे. शेतकरी वाळका चारा, रानातील खुरटे गवत घालून जनावरांचा सांभाळ करत आहेत.