परभणी : ‘‘सोयाबीन हे कपाशी एवढेच राज्यातील आर्थिकदृष्ट्या महत्वाचे पिक आहे. सोयाबीनवरील किडींचे व्यवस्थापन करण्यासाठीची ही योग्य वेळ आहे. विद्यापीठाच्या कीटकशास्त्र विभागाने अत्यंत योग्य वेळी शेतकऱ्यांमध्ये सोयाबीन कीड व्यवस्थापनाबाबत जनजागृती करावी,’’ असे आवाहन कुलगुरु डॉ. अशोक ढवण यांनी केले.
वसंतराव नाईक मराठवाडा कृषी विद्यापीठातील राष्ट्रीय कृषी उच्य शिक्षण प्रकल्प (नाहेप), कृषी कीटकशास्त्र विभाग यांच्यातर्फे ‘सदृढ पर्यावरणासाठी कृषी रसायनांचा संतुलित वापर’ यावरील राज्यस्तरीय वेबीनार मालिकेअंतर्गत शनिवारी (ता.१) ऑनलाइन कार्यशाळा आयोजित करण्यात आली होती. सद्यस्थितीत सोयाबिन पिकावरील प्रमुख किडींचे व्यवस्थान हा त्यातील मुख्य विषय होता. मुख्य मार्गदर्शक प्रा. डॉ. अनंत बडगुजर, डॉ. धीरजकुमार कदम आदी सहभागी झाले होते.
डॉ. बडगुजर म्हणाले, ‘‘सोयाबीन हे पिक बदलत्या वातावरणानुसार किडींसाठी जास्त संवेदनशील बनत आहे. सद्यस्थितीत सोयाबिनमध्ये चक्री भुंगा तसेच खोडमाशी या कीडींचा प्रादुर्भाव तुलनेने अधिक आढळून येत आहे. सध्याचे वातावरण तंबाखूवरील पाने खाणाऱ्या अळीसाठी पुरक आहे. त्यामुळे या किडीच्या सर्वेक्षणावर भर द्या. एकात्मिक कीड व्यवस्थापनाचे तंत्र प्रभावीपणे राबवा. कामगंध सापळयांचा वापर जास्त करावा, नोमोरिया रिलाई या उपयुक्त बुरशीसाठी सद्याचे वातावरण पोषक आहे. त्यामुळे या बुरशीची ४० ग्रॅम प्रति १० लिटर पाण्यात मिसळून फवारणी करावी. ’’ ‘हुमणी’ वर शनिवारी मार्गदर्शन
या राज्यस्तरीय वेबिनार मालिकेच्या पुढील भागात शनिवारी (ता.८) संध्याकाळी सात वाजता ‘हुमणी किडीचे व्यवस्थापन’ या विषयावर किटकशास्त्रज्ञ डॉ. धीरजकुमार कदम हे माहिती देतील. या कार्यक्रमाची लिंक शनिवारी सकाळी प्रसारित करण्यात येईल. शेतकऱ्यांनी सहभागी व्हावे, असे आवाहन विद्यापीठातर्फे करण्यात आले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.