नवनिर्वाचित आमदार राजेश एकडे पोचले बांधावर; केली पीकनुकसानीची पाहणी

बुलडाणा : दोन दिवसांपूर्वी विधानसभा निवडणुकीचा निकाल जाहीर झाला. जिल्ह्यात सर्वात धक्कादायक निकाल ठरलेल्या मलकापूर मतदारसंघात काँग्रेसच्या राजेश एकडे यांनी बाजी मारली. मतदारसंघात एकीकडे विजयाचा जल्लोष सुरू असतानाच आमदारांनी मात्र स्वागत सत्कार बाजूला ठेवत शनिवारी (ता.२६) सकाळीच मतदारसंघातील शेतांना भेटी देत पीक परिस्थितीची पाहणी केली. पीक नुकसानीची भरपाई शेतकऱ्यांना मिळावी, यासाठी शासनाकडे तातडीने पाठपुरावा करणार असल्याचे त्यांनी सांगितले. 

मलकापूर मतदारसंघात या वर्षी पावसाने प्रचंड नुकसान झाले. सोयाबीनला कोंब फुटले असून कापूस पिकाचे नुकसान होत आहे. सततच्या पावसामुळे पिकांचे मोठे नुकसान होत आहे. ही परिस्थिती पाहता आमदार एकडे यांनी नांदुरा तालुक्यातील दहीवडी, शेलगाव, नायगाव कोलासर, पिंप्री अढाव, डवळा बाजार, तरवाडी या परिसरातील गावांना भेट दिली. या वेळी काँग्रेस तालुकाध्यक्ष भगवान धांडे, नायब तहसीलदार मार्कंड, मंडळ अधिकारी जी. टी. ठाकरे, पानझाडे, तालुका कृषी अधिकारी पुरुषोत्तम अंगाईत आदींसह अधिकारी, कर्मचारी व शेतकरी उपस्थित होते.