शक्तिप्रदर्शन करीत भरला राजू शेट्टी यांनी अर्ज

कोल्हापूर : कार्यकर्त्यांच्या उपस्थितीत हातकणंगले लोकसभा मतदारसंघाचे कांग्रेस राष्ट्रवादी आघाडीचे उमेदवार खासदार राजू शेट्टी यांनी गुरुवारी (ता. २८) उमेदवारी अर्ज दाखल केले. या वेळी शेतकरी संघटना व मित्र पक्षाकडून मोठे शक्तिप्रदर्शन करण्यात आले. आमदार जयंत पाटील, आमदार हसन मुश्रीफ, खासदार धनंजय महाडिक, आमदार सतेज पाटील, जयंतराव आवळे आदी काँग्रेस-राष्ट्रवादीच्या नेत्यांसह, रविकांत तुपकर, प्रकाश पोफळे, जालिंदर पाटील, सावकार मादनाईक आणि स्वाभिमानीचे प्रमुख नेते या वेळी उपस्थित होते. दुपारी एकच्या सुमारास दसरा चौकातून हजारो लोकांच्या उपस्थितीत बैलगाडीत बसून श्री. शेट्टी यांची जिल्हाधिकारी कार्यालयाकडे कूच केली. या वेळी त्यांच्या विजयाच्या मोठ्या घोषणा या वेळी देण्यात आल्या. सजवलेल्या बैलगाड्या व ट्रॅक्टर मिरवणुकीचे आकर्षण ठरले. कॉँग्रेस व राष्ट्रवादीच्या सर्व आजी-माजी आमदारांसह पक्षाचे पदाधिकारी, घटक पक्षांचे नेते व पदाधिकारी या सर्वांना निमंत्रित करण्यात आल्याने मोठी गर्दी झाली. कोणत्याही परिस्थितीत श्री शेट्टी यांना निवडून आणण्याचा निर्धार या वेळी करण्यात आला. विविध वक्त्यांनी महायुतीवर मोठे टीकास्त्र सोडले. महाडिक, सतेज पाटील यांची उपस्थिती सध्या कोल्हापूर लोकसभा मतदार संघात काँग्रेस-राष्ट्रवादी आघाडीचे उमेदवार धनंजय महाडिक आहेेत, मात्र काँग्रेस आमदार सतेज पाटील यांनी त्यांचा प्रचार न करण्याचे ठरवले आहे. श्री. शेट्टी यांच्या अर्ज भरतेवेळी मात्र हे दोघे एकत्र दिसले.