कांद्यावरील साठवणूक मर्यादा ३१ मार्चपर्यंत : रामविलास पासवान

रामविलास पासवान
रामविलास पासवान

नवी दिल्ली : कांद्यावर लावण्यात आलेली साठवणूक मर्यादा ३१ मार्चपर्यंत वाढविण्याची परवानगी राज्यांना देण्यात आली आहे. राज्य सरकार ३१ मार्चपर्यंत कांद्यावरील साठवणूक मर्यादा वाढवू शकते, अशी माहिती केंद्रीय अन्नमंत्री रामविलास पासवान यांनी शुक्रवारी (ता. २२) ट्विटरद्वारे दिली. देशातील कांद्याच्या साठ्याविषयी माहिती मिळण्यासाठी कांद्यावरील साठवणूक मर्यादेला ३१ डिसेंबरपासून ३१ मार्चपर्यंत मुदतवाढ देण्यात आली आहे, असे मंत्री पासवान यांनी ट्वीट केले आहे. या आधी देशात व्यापाऱ्यांनी कांदा साठा तयार करून कृत्रिम तुडवडा निर्माण केल्याने दर वाढल्याच्या कारणावरून त्यावर नियंत्रण आणण्यासाठी केंद्र सरकारने राज्यांना कांदा साठ्यावर ३१ डिसेंबरपर्यंत मर्यादा घाण्यास सांगितले होते. परंतु महाराष्ट्र आणि कर्नाटक या महत्त्वाच्या कांदा उत्पादक राज्यांनी साठा मर्यादा घातल्या नव्हत्या.  राष्ट्रीय फलोत्पादन संशोधन आणि विकास महामंडळाच्या आकडेवारीनुसार देशातील महत्त्वाच्या लासलगाव बाजार समितीत सध्या कांद्याचे सरासरी दर प्रतिक्विंटल २७०० रुपयांपर्यंत आहेत. आॅक्टोबर- नोव्हेंबरमध्ये कमी आवक आणि पीक नुकसानीमुळे कांद्याचे दर प्रतिक्विंटल ३२०० ते ३४०० रुपयांपर्यंत वाढले होते.  या आधी साठा मर्यादेला ३१ आॅक्टोबरपासून ३१ डिसेंबरपर्यंत मुदतवाढ देण्यात आली होती. सध्या बाजारात आवक कमीच आहे. मात्र खरिपातील नवीन कांदा बाजारात आल्यानंतर दर आणखी नियंत्रणात येतील, अशी शक्यता व्यापाऱ्यांनी वर्तविली आहे. लासलगाव बाजार समितीत मंगळवारी (ता. १९) ३ हजार ३०० टन आवक झाली होती. मागील महिन्यात याच तारखेला केवळ ८०० टन आवक झाली होती.  कर्नाटक हे महाराष्ट्रानंतर नंबर दोनचे कांदा उत्पादक राज्य आहे. यंदा कर्नाटकमध्ये दुष्काळीस्थिती आहे. त्याचा परिणाम कांदा पिकावर होऊन उत्पादन कमी झाले आहे. सध्या येथील बाजारांमध्ये ७० टक्के कमी कांदा आवक होत आहे. परिणामी येथील दर काही प्रमाणात वाढले आहेत, अशी माहिती कर्नाटकातील कांदा व्यापाऱ्यांनी दिली. कांदा दराची स्थिती आक्टोबर-नोव्हेंबरमध्ये देशांतर्गत कांदा दर वाढले होते. व्यापाऱ्यांनी कांदा साठवणूक करून कृत्रिम टंचाई निर्माण केल्याने दर वाढल्यामुळे केंद्र सरकारने कांद्यावर ३१ आॅक्टोबरपर्यंत साठवणूक मर्यादा घातली. दर अपेक्षेप्रमाणे नियंत्रणात न आल्याने कांद्यावरील साठवणूक मर्यादेला ३१ डिसेंबरपर्यंत मुदतवाढ दिली. शुक्रवारी (ता. २२) केंद्रीय अन्नमंत्री रामविलास पासवान यांनी साठवणूक मर्यादा ३१ मार्चपर्यंत वाढविण्याची परवानगी राज्यांना दिल्याची माहिती ट्विटरद्वारे दिली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com