शेतकऱ्यांना जास्तीत जास्त मदत देण्यासाठी प्रयत्नशील : रावसाहेब दानवे

अर्धापूर, जि. नांदेड  : शेतकऱ्यांच्या आत्महत्या थांबण्यासाठी शासनाने विविध उपाययोजना सुरू केल्या आहेत. शासनाची हमीभाव खरेदी केंद्रे व कापूस खरेदी केंद्रे लवकरच सुरू करण्यात येतील. पावसाने खरीप पिकांचे मोठे नुकसान झाले आहे. शेतकऱ्यांना जास्तीत जास्त मदत देण्यासाठी प्रयत्नशील आहोत, अशी माहिती केंद्रीय राज्यमंत्री रावसाहेब दानवे यांनी दिली.

खैरगाव (ता. अर्धापूर) येथील शेतकऱ्याने कर्ज व नापिकीला कंटाळून तीन दिवसांपूर्वी आत्महत्या केली. शनिवारी (ता. १६) या कुटुंबाचे सांत्वन करून श्री. दानवे यांनी शेतकऱ्यांशी संवाद साधला. तसेच पावसाने नुकसान झालेल्या सोयाबीन पिकाची पाहणी केली. खैरगाव येथील शेतकरी आनंदा बालाजी कल्याणकर (वय ४५) यांनी कर्ज व नापिकीला कंटाळून आत्महत्या केली होती. या शेतकरी कुटुंबाची दानवे यांनी भेट घेऊन त्यांचे सांत्वन केले. खासदार प्रताप पाटील चिखलीकर, आमदार राम पाटील रातोळीकर, तुषार राठोड, राजेश पवार, संतुक हंबर्डे, जिल्हा परिषद सदस्य बबनराव बारसे, उपसभापती डाॅ. लक्ष्मण इंगोले, अॅड. किशोर देशमुख, सुधाकर कदम, नीलेश देशमुख आदी या वेळी उपस्थित होते. या वेळी उपस्थित शेतकऱ्यांनी सरसकट कर्जमाफी, शेतमाल हमीभाव खरेदी केंद्र सुरू करणे, नुकसान झालेल्या शेतकऱ्यांना सरसकट तत्काळ मदत देणे, पंतप्रधान शेतकरी सन्मान योजनेच्या अटी शिथिल करणे आदी व्यथा मांडल्या.

या वेळी श्री. दानवे म्हणाले, की मराठवाड्यातील आठ व विदर्भातील सहा जिल्ह्यांतील शेतकऱ्यांसाठी तीन रुपये किलो दराने तांदूळ व दोन रुपये दराने गहू देण्यात येत आहे. तसेच शेतकऱ्यांच्या खात्यावर वर्षाला सहा हजार जमा करण्यात येत आहेत. तिजोरीत पैसा वाढल्यावर रकमेत वाढ करण्यात येईल. शासन शेतकऱ्यांशी पाठीशी आहे. पावसाने झालेल्या नुकसानीचे सर्वेक्षण करण्यात येत आहे. झालेल्या नुकसानीचे पंचनामे करण्यात येत आहेत. नुकसानीचा अंतिम आहवाल प्राप्त झाल्यावर शेतकऱ्यांना मदत देण्यात येईल. माजी मुख्यमंत्री देवेंद्र फडणवीस यांनी मदतीसाठी दहा हजार कोंटीची तरतूद केली आहे. विम्यासाठी कृषी कार्यालयात तक्रारी कराव्यात, अशी माहिती श्री. दानवे यांनी दिली.