रविकांत तुपकर यांचा पुन्हा `स्वाभिमानी`त प्रवेश

कोल्हापूर : स्वाभिमानी शेतकरी संघटनेच्या अंतर्गत कुरबुरीला कंटाळून संघटनेतून बाहेर पडलेल्या रविकांत तुपकर यांनी पुन्हा ‘यू टर्न’ घेत बुधवारी (ता. १६) अचानक स्वगृही प्रवेश केला. स्वाभिमानी शेतकरी संघटनेचे प्रमुख, माजी खासदार राजू शेट्टी यांच्या उपस्थितीत बैठकीत त्यांनी हा प्रवेश केला. रविकांत तुपकर यांनी पंधरवड्यापूर्वी रयत क्रांती संघटनेत प्रवेश केला होता. मात्र, आता तुपकर यांचा ‘स्वाभिमानी’तील प्रवेश सदाभाऊ खोत यांच्यासाठी धक्का मानला जात आहे.

दरम्यान, पत्रकार परिषदेत बोलताना श्री. तुपकर म्हणाले, की संघटनेत अंतर्गत कुरबुरी वाढल्या होत्या. मला पदाचा कोणताही लोभ नव्हता आणि नाही. श्री. शेट्टी यांनी सांगूनही कुरबुरी थांबत नव्हत्या. त्यामुळे चिडून मी राजीनामा दिला. कार्यकर्त्यांनी नाराजी व्यक्त केली. पण, खालच्या पातळीवर जाऊन टीका केली नाही. अनेक कार्यकर्त्यांनी भावनिक साद घातली. अखेर चळवळ महत्त्वाची मानून मी स्वगृही आलो आहे. येथून पुढे संघटनेच्या उमेदवाराबरोबरच कााँग्रेस-राष्ट्रवादी आघाडीच्या उमेदवारांच्या प्रचाराला वेगाने सुरवात करणार आहे. श्री. शेट्टी म्हणाले, की संघटनेत काही ताणतणाव आहेत. पण, सध्याची परिस्थिती पाहता हे अंतर्गत वाद मिटवून आम्ही तुपकर यांच्या साथीने पुन्हा चळवळ जोरदार करू.