स्वाभिमानी शेतकरी संघटनेचा रविकांत तुपकर यांचा राजीनामा

अकोला ः स्वाभिमानी शेतकरी संघटनेच्या पक्षाचे प्रदेशाध्यक्ष असलेले रविकांत तुपकर यांनी आपल्या पदाचा व संघटनेच्या सदस्यत्वाचा राजीनामा माजी खासदार राजू शेट्टी यांच्याकडे पाठविला आहे. तुपकरांनी विधानसभा निवडणुकीच्या तोंडावर संघटनेला सोडचिठ्ठी दिल्याने मोठी खळबळ उडाली आहे. संघटनेचे युवानेते, मुलुख मैदानी तोफ म्हणून तुपकरांची राज्यभर ओळख बनली होती. त्यांनी हा राजीनामा वैयक्तिक कारणाने दिला की राजकीय, हे मात्र स्पष्ट झालेले नाही.

विधानसभा निवडणुकीसाठी स्वाभिमानीची कॉंग्रेस-राष्ट्रवादी कॉंग्रेस सोबत आघाडी झालेली असून योग्य मतदारसंघात उमेदवारी मिळण्याची शक्यता नसल्याने तुपकरांनी हे पाऊल उचलल्याचे बोलले जात आहे. तुपकरांना बुलडाणा जिल्ह्यात तिकीट मिळण्याची शक्यता नव्हती. याठिकाणी त्यांच्यासाठी सोयीचे असलेले चिखली, बुलडाणा हे दोन्ही मतदारसंघ कॉंग्रेसच्या ताब्यात असून तेथे पक्षाकडून दोन्ही विद्यमान आमदारांना पुन्हा उमेदवारी मिळण्याची शक्यता आहे.

नुकत्याच झालेल्या लोकसभा निवडणुकीच्या वेळी राष्ट्रवादीच्या उमेदवारासाठी रविकांत तुपकर यांना थांबविण्यात आले होते. २०१४ च्या निवडणुकीतही त्यांना थांबण्याचा सल्ला देण्यात आला होता. पुन्हा या वेळी उमेदवारीसाठी थांबण्याचा सल्ला मिळण्याचीच चिन्हे दिसत असल्याने त्यांनी ही भूमिका घेतली असावी, असा कयास लावल्या जात आहे. 

गेल्या दोन दिवसांपासून तुपकर हे नॉट रिचेबल आहेत. ते भाजपमध्ये जात असल्याच्या बातम्या सोशल मीडियात झळकल्या सुद्धा. मात्र, संपर्क न झाल्याने त्यांच्या भूमिकेबाबत कुठलाही खुलासा झालेला नाही. गुरुवारी (ता. २६) त्यांच्या अधिकृत ईमेलवरून माध्यमांना राजीनामा प्राप्त झाला. अद्यापही त्यांचा संपर्क होऊ शकलेला नाही. कदाचित दोन दिवसांत त्यांच्या या राजीनाम्याचे कारण समोर येईल, असे सांगितले जाते.