सोलापूर ः उसाला पहिली उचल २७०० रुपये देण्याच्या मागणीवर ठाम असलेल्या शेतकरी संघटनांकडून आंदोलनाची धार दिवसेंदिवस वाढतच आहे. बुधवारी (ता. १५) सहकारमंत्री सुभाष देशमुख यांच्या सोलापुरातील निवासस्थानासमोर रयत क्रांती संघटनेने उपोषण करण्याचा इशारा दिला होता. त्यासाठी जिल्ह्यातून कार्यकर्ते सोलापूरकडे निघाले होते. पण शहराबाहेर सावळेश्‍वर टोल नाक्‍यावरच पोलिसांनी कार्यकर्त्यांच्या गाड्या अडवल्या.
तरीही या आंदोलनाच्या पार्श्‍वभूमीवर मंत्री देशमुख यांच्या होटगी रस्त्यावरील निवासस्थानाजवळ मोठा पोलिस बंदोबस्त लावण्यात आला होता. दरम्यान, बुधवारीही जिल्ह्यात ठिकठिकाणी रास्ता रोको, उपोषण, सरकारच्या निषेधार्थ मुंडण यांसारखी आंदोलने सुरूच आहेत. त्यामुळे ऊसदराचे हे आंदोलन चिघळण्याची चिन्हे आहेत.
अक्कलकोट, पंढरपूर, मोहोळ, मंगळवेढा, माढा या तालुक्‍यांत आंदोलनाची धग वाढते आहे, पण ना प्रशासन, ना कारखानदार ना मंत्री कोणीच याची दाखल घेत नसल्याने त्याची धार वाढतच राहणार आहे, अशीच परिस्थिती राहिली, तर आंदोलन आणखी चिघळण्याची शक्‍यता आहे. बुधवारी ठरल्याप्रमाणे रयतचे कार्यकर्ते दीपक भोसले यांच्या नेतृत्वाखाली सहकारमंत्र्यांच्या निवासस्थानाकडे निघाले होते. पण सोलापूर-पुणे महामार्गावर त्यांच्या गाड्या अडवल्या, त्यानंतर त्यांनी जिल्हाधिकारी कार्यालयासमोर ठिय्या देण्याचा निर्णय घेतला.
माचणूरला रास्ता रोको
स्वाभिमानी शेतकरी संघटनेने बुधवारी (ता. १५) सकाळी दहाच्या सुमारास माचणूर येथे सोलापूर-मंगळवेढा महामार्गावर रास्ता रोको आंदोलन केले. उसाला पहिला हप्ता ३००० रुपये द्यावा, अशी मागणी या वेळी आंदोलनकर्त्यांनी केली. पंढरपूर-मंगळवेढा स्वाभिमानी शेतकरी संघटनेचे अध्यक्ष राहुल घुले यांच्या नेतृत्वाखाली हे आंदोलन झाले.
माढा, उंदरगावातही अांदोलने
माढा शहरातील छत्रपती शिवाजी महाराज चौक व उंदरगाव येथे बळिराजा शेतकरी संघटना, शिवसेना, स्वाभिमानी शेतकरी संघटना, रयत क्रांती संघटनेने ‘रास्ता रोको' केला. यंदाच्या हंगामात उसाला ३४०० रुपये दर द्यावा, या मागणीसाठी प्रहार जनशक्ती पक्षाने सहकारमंत्री सुभाष देशमुख यांच्या होटगी रस्त्यावरील घरासमोर शुक्रवारी (ता. १७) रक्तदान शिबिराचे आयोजन केले अाहे.
