येवला, निफाडच्या दुष्काळी परिस्थितीची फेरपाहणी करणार

नाशिक : येवला आणि निफाड तालुक्यांतील दुष्काळी परिस्थितीची फेरपाहणी करण्यासाठी राज्य सरकारतर्फे पथक पाठवण्यात येईल, असे आश्वासन मुख्यमंत्री देवेंद्र फडणवीस यांनी छगन भुजबळ यांना दिले आहे.

नाशिक जिल्ह्यातील येवला व निफाडसह इतर तालुक्यांमध्ये तीव्र दुष्काळ असूनही या तालुक्यांमध्ये दुष्काळ जाहीर केलेला नाही. याबाबत भुजबळ यांनी मुख्यमंत्र्यांना पत्र पाठविले होते. त्यानुसार नाशिक जिल्ह्यातील बागलाण, चांदवड, देवळा, इगतपुरी, मालेगाव, नांदगाव, नाशिक व सिन्नर या आठ तालुक्यांमध्ये पीक कापणी प्रयोग हाती घेण्याचे निर्देश देण्यात आलेले आहेत. या प्रयोगामध्ये मदारसंघातील येवला व निफाड तालुक्यांचा समावेश नाही. या तालुक्यात प्रचंड दुष्काळ असतानाही पावसाच्या आकडेवारीसाठी तालुक्याची सरासरी काढल्यामुळे हा प्रकार झाला आहे. तालुक्याची सरासरी न धरता मंडलनिहाय पाऊस व इतर इंडिकेटर्सचा विचार करणे आवश्यक आहे. राज्य शासनाच्या महसूल यंत्रणेने पाठविलेल्या अहवालांचासुद्धा पीक कापणी प्रयोगासाठी विचार झाला नाही.

नॅशनल सेंटर फॉर क्रॉप फोरकास्टिंग या संस्थेकडून मिळालेल्या पीक पाण्याच्या स्थितीनुसार दुष्काळ सदृश तालुके जाहीर करण्यात येणार आहेत. कोल्हापूरमधील राधानगरी व गगनबावडा इ. तालुक्यांमध्ये अतिवृष्टी होऊनही या तालुक्यांचा दुष्काळसदृश यादीत समावेश होतो. मात्र तीव्र दुष्काळ आणि पाणीटंचाई असूनही येवला तालुक्याला वगळले जाते, हे अत्यंत संतापजनक असल्याचे भुजबळ यांनी म्हटले होते.येवला व निफाड तालुक्यांसह नाशिक जिल्ह्यातील इतर तालुक्यांमध्ये प्रचंड दुष्काळ आहे. त्यामुळे येथील सद्यपरिस्थितीची पाहणी करण्यासाठी राज्य शासनाने पथक पाठवून या तालुक्यांमध्ये दुष्काळ जाहीर करावा, अशी भुजबळ यांची मागणी आहे. त्यावर मुख्यमंत्र्यांनी दोन्ही तालुक्यांमध्ये पथक पाठवून फेरपाहणी करण्याचे आश्वासन दिले आहे.