मेळघाट व्याघ्र प्रकल्पाची होणार पुनर्रचना

अमरावती : मेळघाट व्याघ्र प्रकल्पाच्या  पुनर्रचनेला शासनाने हिरवा कंदील दाखविला आहे. त्यामुळे आता आदिवासी व प्रशासनात काही वर्षांपासून सुरु असलेल्या संघर्षाला पूर्णविराम मिळण्याची शक्‍यता आहे.

बफरक्षेत्र हे आता क्षेत्रसंचालकांच्या नियंत्रणाखाली येणार आहे. प्रशासनाला त्यामुळे प्रभावीपणे काम करता येईल. अमरावती वनवृत्तामध्ये पूर्व व पश्‍चिम मेळघाटातील बफरक्षेत्र व्याघ्र प्रकल्पाकडे वळते केले. त्यानंतर उर्वरित दोन प्रादेशिक वनवृत्तामध्ये मेळघाट प्रादेशिक वनविभाग निर्माण करण्यात येत आहे. उपवनसंरक्षक पश्‍चिम मेळघाट वनविभाग यांच्या पदनामात उपवनसंरक्षक मेळघाट (प्रादेशिक) वनविभाग असा बदल करण्यात आला आहे. या विभागाचे मुख्यालय परतवाडा येथे राहील.

नव्या मेळघाट प्रादेशिक वनविभागाचे वनपरिक्षेत्रनिहाय नियोजनासाठी तीन उपविभाग होत आहेत.  कामकाजावर नियंत्रण ठेवण्यासाठी उपविभाग एकचे मुख्यालय धारणी, उपविभाग दोनचे मुख्यालय घटांग आणि उपविभाग तीनचे मुख्यालय परतवाडा येथे राहील. या उपविभागाचे व्यवस्थापन सहाय्यक वनसंरक्षक दर्जाच्या अधिकाऱ्याकडे राहील. यवतमाळ वनवृत्ताअंतर्गंत अकोला (प्रादेशिक) वनविभागाचे बफरक्षेत्र व्याघ्रप्रकल्पाकडे हस्तांतरित करण्यात येईल. तसेच अकोला (प्रादेशिक) वनविभागाकडे असलेले वाशीम जिल्हयाचे वनक्षेत्र वगळण्यात येईल. अकोला जिल्हयातील वनक्षेत्रासाठी अकोला वनविभागाची पुर्नरचना होत आहे. वाशीम जिल्हयातील क्षेत्रासाठी वाशीम वनवृत्त निर्माण करण्यात येत आहे.