सांगलीत महापुराचा नवा विक्रम

सांगली  : सांगलीत आलेल्या महापुराने बुधवारी सकाळी २००५ मधील सर्वोच्च पातळीचे विक्रम मोडले. येथील आयर्विन पुलाजवळ बुधवारी सकाळी ५४ फूट पाणीपातळीची नोंद झाली. त्यानंतर दुपारी साडेतीन वाजता ५५ फूट पाणीपातळीची नोंद झाली. पंधरा वर्षांपूर्वी आलेल्या पुरावेळी ५३ फूट नऊ इंच इतकी पाणीपातळी होती. या महापुराने निम्मे शहर पाण्याखाली असून, जिल्ह्यातील ७५ हजारहून अधिक नागरिक बाधित झाले आहेत. अनेक गावांचा संपर्क तुटला आहे. ‘एनडीआरएफ’च्या दोन टीम पूरग्रस्तांना बाहेर काढण्यासाठी मदत करीत आहे.

महापुराने सांगली शहराला वेढा घातला आहे. रात्री पावसाचा जोर ओसरला असला तरी कोयना धरणातून सोडलेल्या एक लाख २१ हजार क्युसेक पाण्यामुळे कृष्णेच्या पाणीपातळीत मात्र वाढ होत आहे. त्यामुळे वेगाने पाणीपातळी वाढत आहे. रात्री दोन वाजता आयर्विन पुलाजवळ पाणीपातळी ५३ फूट होती. ती सकाळी आठ वाजता ५४ फूट  झाली. शहरातील सराफ कट्टा, मेन रोड, हरभट रोड, एसटी स्टँड, महापालिका चौक, राजवाडा चौक, स्टेशन चौक, श्‍यामरावनगर, गावभाग, टिळक स्मारक मल्टिप्लेक्स या सर्व ठिकाणी पाणी साठले आहे. शहरातील सुमारे दहा हजार नागरिक या पुराने बाधित झाले असून, जनजीवन विस्कळित झाले आहे.  

निम्म्यापेक्षा जास्त वाळवा तालुका पुराच्या छायेत असताना इस्लामपूर शहरातील पेट्रोल पंप बंद करण्यात आले आहेत. तालुक्याची यंत्रणा संपूर्ण इस्लामपूर शहरातून हाताळली जात असताना आता पेट्रोल मिळणे बंद झाल्याने अडचणी वाढल्या आहेत. सकाळी फक्त एक लिटर इतके मर्यादित पेट्रोल मिळत होते, परंतु आता तेही देणे बंद केले आहे. वाळवा तालुक्यातील सुमारे पन्नासहून अधिक गावे महापुराने बाधित झाली आहेत. या गावातील लोकांना सध्या इस्लामपूर शहरातून मदतीचा ओघ सुरू आहे. 

अशी आहे स्थिती :