वाशीम ः रिसोड कृषी उत्पन्न बाजार समितीमध्ये सोयाबीनची मोठ्या प्रमाणात आवक वाढली असून बुधवारी (ता. २८) उशिरापर्यंत चालू असलेला लिलाव थांबवल्यामुळे काही काळ शेतकरी आक्रमक झाले होते. प्रशासनाने मध्यस्थी करून गुरुवारी (ता. २९) येथील बाजारातील कामकाज पूर्ववत सुरू करण्यात आले.
सध्या बाजारात सोयाबीनची आवक मोठ्या प्रमाणात होत आहे. बुधवारी रिसोड बाजार समितीत सुमारे १२ हजार पोत्यांची विक्रमी आवक झाली होती. पहिल्यांदाच एवढी आवक झाल्याने हे आवार सर्वत्र भरून गेले. लिलाव रात्री उशिरापर्यंत सुरू होता. परंतु अंधारामुळे या कामात अडचणी येत होत्या. अखेरीस लिलाव थांबविण्यात आले.
काही शेतकऱ्यांनी संपूर्ण मालाचा लिलाव करण्याचा आग्रह धरला. हमाल लिलाव झालेल्या मालाचे मोजमाप करीत असताना शेतकऱ्यांनी जोपर्यंत आमच्या मालाचा लिलाव होत नाही तोपर्यंत मोजमाप थांबवा असे म्हणून काही शेतकऱ्यांनी आक्रमक भूमिका घेतली. यावेळी हमाल शेतकरी व्यापारी यांच्यामध्ये शाब्दिक वाद निर्माण झाला. जवळपास चार हजार क्विंटल सोयाबीनचा लिलाव बुधवारी होऊ शकला नव्हता. त्यामुळे गुरुवारी सकाळीच लिलाव पूर्ववत करू, असे बाजार समितीचे सचिव विजयराव देशमुख यांनी सांगितले.
त्यानुसार गुरुवारी सकाळीच कामकाज सुरू झाले. सोयाबीनची आवक अधिक असल्याने गुरुवारचा हळद बाजार रद्द करण्याचा निर्णय घेण्यात आला. गुरुवारी बाजारात सोयाबीनचा दर कमी निघाल्याने शेतकऱ्यांमध्ये नाराजीचा सूर मात्र उमटला होता.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.