लाल कांदा लागवड खानदेशात घटली

जळगाव ः खानदेशात खरिपातील लाल कांद्याची लागवड सुमारे ५०० ते ६०० हेक्‍टरने घटली आहे. अनेक भागांत अतिपावसाने रोपांचे नुकसान झाले तर काही भागांत उन्हाळ्यात दर समाधानकारक नसल्याने शेतकऱ्यांनी लागवड टाळली.  कांद्याचे दर मागील वर्षी डिसेंबरपासून ते यंदा जुलैपर्यंत दबावात राहिले. मागील खरिपातील व रब्बीमधील कांद्याला उत्पादन खर्चाएवढा दर बाजारात न मिळाल्याने खानदेशात धुळे व जळगाव जिल्ह्यांतील लागवड या खरिपात कमी झाली आहे. अनेक शेतकऱ्यांनी पीक परवडत नाही यामुळे लागवड टाळली. तर धुळ्यातील शिरपूर, जळगावमधील चोपडा, यावल व जळगाव भागांत ज्यांनी कांदा लागवडीसंबंधी तयारी केली, त्यांच्या रोपवाटिकांमध्ये अतिपावसाने नुकसान झाल्याने संबंधित शेतकरी वेळेत लागवड करू शकले नाहीत.  धुळे जिल्ह्यातील साक्री, धुळे व शिरपूर या भागांत मिळून सुमारे दीड ते दोन हजार हेक्‍टरवर खरिपातील कांदा आहे. तर जळगाव जिल्ह्यात चोपडा, यावल, जळगाव, पाचोरा, जामनेर, चाळीसगाव या भागांत मिळून सुमारे एक हजार ते ११०० हेक्‍टरवर खरिपातील कांदा आहे. मागील हंगामात खानदेशात सुमारे चार हजार हेक्‍टरवर कांद्याची लागवड झाली होती. यंदा लागवड घटल्याने बाजारातील आवकही कमी राहील, अशी स्थिती आहे. यातच ज्यांनी ऑगस्टच्या सुरवातीला लागवड केली, त्या शेतकऱ्यांच्या शेतात दिवाळीनंतर काढणी सुरू होईल. साक्री भागात काढणी या महिन्याच्या २२ किंवा २५ तारखेला सुरू होऊ शकते. हलक्‍या, मुरमाड भागांत पीक बऱ्यापैकी आहे. या भागात उत्पादन चांगले हाती येईल, असे सांगितले जात आहे.