नांदेड, परभणी, हिंगोली जिल्ह्यांत दुधात साडेतीन लाख लिटरची घट

परभणी : शासकीय दूध योजनेतंर्गंत येथील दुग्ध शाळेतील दूध संकलनात यंदाच्या मे महिन्याच्या तुलनेत जून महिन्यात ३ लाख ५४ हजार १४ लिटरने घट झाली आहे. यंदाच्या मे महिन्यात १६ लाख ९३ हजार ५८६ लिटर, तर जूनमध्ये १३ लाख ३९ हजार ५७२ लिटर दूध संकलन झाले. पावसाअभावी चाऱ्याची उपलब्धता कमी झाली आहे. दूग्धशाळेकडून दुधाची देयके मिळण्यास विलंब लागत असल्याने दूध संकलनात घट झाली.

सध्या परभणी येथील दुग्ध शाळेत परभणी, हिंगोली, नांदेड जिल्ह्यांतील दूध संकलन केले जात आहे. मे महिन्यात परभणी तालुक्यातील ५ लाख ७० हजार ४७४ लिटर दूध संकलन झाले होते. पाथरी तालुक्यातून ६ लाख ६३ हजार ७१२ लिटर, गंगाखे तालुक्यातील २ लाख ५६ हजार ५१५ लिटर, हिंगोली जिल्ह्यातील १ लाख ३२ हजार ४३५ लिटर, नांदेड जिल्ह्यातील ७० हजार ४५० लिटर असे मे महिन्यात प्रतिदिन सरासरी ५४ हजार ६३२ या प्रमाणे एकूण १६ लाख ९३ हजार ५८६ लिटर दूध संकलन झाले.

जूनमध्ये परभणी तालुक्यातील ४ लाख ६० हजार १३८ लिटर, पाथरीतील ५ लाख ३१ हजार ३८९ लिटर, गंगाखेडमधील १ लाख ९७ हजार ४६१ लिटर, हिंगोली जिल्ह्यातील १ लाख ४८७ लिटर, नांदेड जिल्ह्यातील ४३ हजार ३०३ लिटर असे प्रतिदिन सरासरी ४४ हजार ६५२ लिटर याप्रमाणे एकूण १३ लाख ३९ हजार ५७२ लिटर दूध संकलन झाले. 

अनेक शेतकऱ्यांकडील साठवून ठेवलेला चारा संपला आहे. दुधाची देयके दोन -दोन महिने मिळत नाहीत. त्यामुळे अनेक शेतकऱ्यांनी दुधाळ जनावरांची विक्री करून दुग्ध व्यवसाय बंद केले. 

तुलनात्मक दूध संकलन स्थिती (लिटर)