नांदेड जिल्ह्यात कापूस विक्रीसाठी गुगल लिंकव्दारे नोंदणी 

नांदेड ः खरेदी केंद्रावर होणारी गर्दी टाळण्यासाठी नांदेड जिल्ह्यातील शेतकऱ्यांना भारतीय कापूस महामंडळ (सीसीआयच्या) खरेदी केंद्रांवर कापूस विक्रीसाठी गुगल डाॅक लिंकव्दारे नोंदणी करण्याची सुविधा उपलब्ध करून देण्यात आली आहे. या लिंकव्दारे नोंदणी केलेल्या शेतकऱ्यांचा कापूस संबंधित खरेदी केंद्रांवर स्वीकारण्यात येईल. त्यामुळे शेतकऱ्यांनी या लिंकव्दारे नोंदणी करावी, असे आवाहन जिल्हा उपनिबंधक (सहकारी संस्था) प्रवीण फडणीस यांनी केले आहे. 

लॅाकडाऊनमुळे राज्य सहकारी कापूस उत्पादक पणन महासंघ (फेडरेशन) आणि भारतीय कापूस महामंडळ (सीसीआय)तसेच खासगी कापूस खरेदी बंद असल्यामुळे जिल्ह्यातील अनेक तालुक्यातील शेतकऱ्यांना कापूस विक्री करता येत नाही. सद्यःस्थितीत तापमानात वाढ होत असल्यामुळे घरात कापूस साठवून ठेवणे धोकादायक झाले आहे. 

कापूस विक्रीसाठी येणाऱ्या अडचणी सोडविण्याची मागणी शेतकऱ्यांनी जिल्हा प्रशासनाकडे केली होती. जिल्हाधिकारी डॉ. विपीन ईटनकर यांनी शुक्रवारी (ता. १०) ‘कोरोना’शी निगडित विविध विषयांवर व्हिडिओ कॉन्फरन्सद्वारे जिल्ह्यातील सर्व उपविभागीय अधिकारी, तहसीलदार यांच्याशी संवाद साधला.कंधारचे उपविभागीय अधिकारी पांडुरंग बोरगावकर, तहसीलदार सखाराम मांडवगडे, तालुका कृषी अधिकारी रमेश देशमुख, सहाय्यक निबंधक जी. आर. कौरवार आदी व्हिडिओ कॅान्फन्सिंगमध्ये सहभागी झाले होते. 

बाजार समितीचे सचिव पी. डी. वंजे यांनी यावेळी कंधार तसेच इतर तालुक्यातील कापूस उत्पादकांना कापूस विक्रीसाठी येत असलेल्या अडचणीबाबत सविस्तर सूचना दिल्या. जिल्ह्यातील इतर तालुक्यांतील शेतकऱ्यांनी देखील याच पद्धतीने नोंदणी करावयाची आहे. या लिंकची माहिती संबंधित तलाठी, कृषी सहायक हे क्षेत्रीय कर्मचाऱ्यांमार्फत त्या-त्या गावातील सरपंच आणि पोलिस पाटील, कापूस उत्पादक शेतकऱ्यांना द्यावी, असे आदेश देण्यात आले आहेत.

या लिंकव्दारे नोंदणी केलेल्या शेतकऱ्यांचा कापूस सीसीआयच्या संबंधित केंद्रांवर खरेदी करण्यात येईल. शेतकऱ्यांनी दर्जेदार कापूसच (एफएक्यू)विक्रीसाठी आणावा. खरेदी केंद्रावरील रुईच्या गाठी (गठाण) आणि सरकी वाहतुकीसाठी प्रशासनाकडून आवश्यक सहकार्य केले जाईल. कापूस खरेदीसाठी केंद्र प्रमुखांनी इतर कुठलीही सबब पुढे करू नये, अशा सूचना डॉ. इटनकर यांनी केल्या. 

या ठिकाणी विक्रीची सुविधा  भारतीय कापूस महामंडळाची (सीसीआय) जिल्ह्यात नांदेड, किनवट, धर्माबाद, नायगाव, कुंटूर, बिलोली या सहा ठिकाणी खरेदी केंद्र आहेत.कंधार आणि लोहा तालुक्यातील शेतकऱ्यांना नांदेड आणि नायगाव येथील खरेदी कापूस विक्रीची सुविधा उपलब्ध करून देण्यात आलेली आहे. 

खालील लिंकवर करा नोंदणी  कंधार आणि लोहा तालुक्यातील शेतकऱ्यांना कापूस विक्रीसाठी https://docs.google.com/forms/d/e/1FAIpQLSeEQfYAAhXbiMJMiQj6CuT2vL0uDw6Xeq1eUc228fwJ4kuw0A/viewform या गुगल डाॅक लिंकव्दारे नोंदणी करण्याची सुविधा उपलब्ध करून देण्यात आली आहे.