`उर्ध्व पेनगंगाचे पाणी सोडा`

नांदेड : मालेगाव (ता. अर्धापूर) परिसरातील गावांसाठी पिण्याचे पाणी, जनावरांच्या चारा- पाण्याचा मोठा प्रश्न निर्माण झाला आहे. त्यामुळे उर्ध्व पेनगंगा प्रकल्पाचे पाणी नदी- नाल्यांद्वारे सोडून शेतकरी, ग्रामस्थांना दिलासा द्यावा, अशी मागणी ग्रामपंचायतींनी केली आहे. दाभडी नाल्यातून पाणी न सोडल्यास शेतकऱ्यांच्या वतीने मालेगाव येथे रास्ता रोको आंदोलन करण्यात येईल, असा इशारा शेतकरी नेते प्रल्हाद इंगोले, माजी जि. प. अध्यक्ष माणिकराव इंगाेले, शिवसेनेचे माजी उपजिल्हा प्रमुख नागोराव इंगोले यांनी दिला.

थकीत पाणीपट्टीच्या नावाखाली प्रशासन चालढकलपणा करीत आहे. जिल्हाधिकाऱ्यांनी दिलेल्या आदेशानुसार पाणी सोडावे, ग्रामीण भागात दुष्काळाची मोठी दाहकता आहे. नागरिकांना पिण्याच्या पाण्यासह जनावरांच्या चारा- पाण्याची टंचाई जाणवत आहे. उर्दू पेनगंगा प्रकल्पातील पाणी नद्या नाल्यांना सोडावे, यासाठी अर्धापूर, नांदेड, मुदखेड तालुक्यांतील अनेक ग्रामपंचायतींनी अशा स्वरूपाचा ठराव घेऊन जिल्हा प्रशासनाला कळवले. 

नद्या, नाल्यांना पाणी आल्यास काही प्रमाणात दिलासा मिळू शकतो. परंतु, थकीत पाणीपट्टीची कारणे सांगून मालेगाव परिसराला पाणी सोडण्यास प्रशासन टाळाटाळ करीत आहे. ही बाब अत्यंत गंभीर आहे. ग्रामपंचायतींनी पैसे न भरल्यास प्रशासन पाणी सोडणार नसेल, तर रास्ता रोको आंदोलनासह तीव्र आंदोलन करण्याचा इशारा प्रल्हाद इंगोले यांनी दिला.