शिवसेनाप्रमुखांचा आज स्मृतिदिन

मुंबई  : शिवसेनाप्रमुख बाळासाहेब ठाकरे यांचा आज (रविवारी) स्मृतिदिन असून, शिवाजी पार्क येथील कार्यक्रमात दोन्ही कॉंग्रेसचे नेतेही बाळासाहेब ठाकरे यांना अभिवादन करणार आहेत. तसेच, यानिमित्ताने त्यांना मानवंदना देण्यासाठी महाराष्ट्रासह देशभरातून लाखो शिवसैनिकांची गर्दी शिवतीर्थावर उसळणार आहे.

दरम्यान, रविवारी एनडीएने घटकपक्षांची बैठक बोलावली आहे. मात्र, या बैठकीला शिवसेनेचे नेते सहभागी होणार नाहीत. कारण, सगळे शिवसैनिक बाळासाहेब ठाकरे यांच्या स्मृतिदिनानिमित्त शिवतीर्थावर जमणार आहेत. या वेळी बदललेल्या राजकीय समीकरणामुळे दोन्ही कॉंग्रेसचे काही नेतेही उपस्थित राहणार असल्याचे सांगण्यात येत आहे.

शिवसेनाप्रमुख बाळासाहेब ठाकरे यांना नमन करण्यासाठी आज हजारो नागरिक शिवाजी पार्कवर जमणार आहेत. याच पार्श्वभूमीवर मुंबई महापालिकेकडून मोठ्या प्रमाणावर तयारी सुरू आहे. बाळासाहेब ठाकरे यांच्या स्मृतिस्थळी रंगरंगोटी आणि इतर व्यवस्था केली आहे. आज या संपूर्ण परिसरात मोठ्या प्रमाणावर पोलिस बंदोबस्त तैनात असणार आहे. पदाधिकारी आणि आमदारांसाठी एक वेगळे गेट असणार आहे. याचबरोबर मोठ्या प्रमाणावर सामान्य नागरिकदेखील या ठिकाणी येणार असल्याने त्यांच्यासाठी दोन वेगळ्या गेटची सुविधा करण्यात आली आहे. 

राज्यात शिवसेना, कॉंग्रेस आणि राष्ट्रवादी कॉंग्रेस लवकरच सरकार स्थापन करणार आहे. अशात आज शिवसेनेव्यतिरिक्त राष्ट्रवादी आणि कॉंग्रेसचे अनेक मोठे नेते हे शिवाजी पार्कवर बाळासाहेब ठाकरे यांच्या स्मृतीस नमन करण्यास येण्याची शक्‍यता आहे.