तूर खरेदीला जळगाव जिल्ह्यात चार केंद्रांमध्ये प्रतिसाद

जळगाव ः जिल्ह्यात रावेर, मुक्ताईनगर, बोदवड व अमळनेर येथे शासकीय तूर खरेदीला चांगला प्रतिसाद मिळत असून, प्रतिदिन १०० क्विंटलपर्यंतची खरेदी या केंद्रांमध्ये होत आहे.  जिल्ह्यात काही खरेदी केंद्र मागील सोमवारी (ता. २) तर काही केंद्र मागील दोन दिवसांत सुरू झाले आहेत. १० केंद्र आहेत. त्यात चाळीसगाव, भडगाव, चोपडा, जळगाव, जामनेर व  पाचोरा या केंद्रांचाही समावेश आहेत. परंतु जळगाव, भडगाव, चोपडा येथील केंद्रात तूर खरेदीला प्रतिसाद मिळालेला नाही. तूर विक्रीसंबंधी शेतकरी ऑनलाइन नोंदणी संबंधित केंद्रात येत्या १५ मार्चपर्यंत करू शकणार आहेत. सुमारे तीन हजारांपेक्षा अधिक शेतकऱ्यांनी तूर विक्रीसंबंधीची ऑनलाइन नोंदणी करून घेतली आहे. तुरीचे दर बाजारात कमाल पाच हजार रुपये प्रतिक्विंटलपर्यंत आहेत. तर शासकीय केंद्रात ५८०० रुपये प्रतिक्विंटल, या दरात तुरीची खरेदी सुरू आहे. शासकीय तूर खरेदी सुरू झाल्याने बाजारात तूर दरांमध्ये सुधारणा झाली आहे.  यातच जिल्ह्यात १२ केंद्रांमध्ये हरभरा खरेदीचे नियोजन जिल्हा प्रशासनाने केले आहे. यात जेथे तूर खरेदी सुरू आहे, ती १० केंद्र व यावल आणि पारोळा येथे हरभरा खरेदी सुरू करण्याची तयारी सुरू असून, यासंदर्भात शेतकऱ्यांच्या हरभरा विक्रीबाबतची ऑनलाइन नोंदणी सुरू करण्याचे आदेश केंद्रधारकांना मार्केटिंग फेडरेशनने दिले आहेत. परंतु केंद्रधारकांनी ज्वारी, मका आदी खरेदी करताना आलेला वाहतूक खर्च, कमिशन मार्केटिंग फेडरेशनने अदा करावे.  हे चुकारे मिळत नाहीत, तोपर्यंत ऑनलाइन नोंदणी करणार नाही, अशी भूमिका केंद्रधारकांनी घेतली आहे. यामुळे ऑनलाइन नोंदणी बंदावस्थेतच आहे. यातच येत्या सोमवारपासून (ता. ९) कुठल्याही स्थितीत ऑनलाइन नोंदणी सुरू केली पाहिजे, असे पुन्हा फेडरेशनने केंद्रधारकांना पत्र देऊन बजावले आहे. परंतु, केंद्रधारकांनी या पत्रालाही प्रतिसाद दिलेला नसल्याचे चित्र आहे.