नगरमध्ये मदतीचे फोटो प्रसारित करण्यावर प्रतिबंध 

नगर : शासनाने जाहीर केलेल्या लॉकडाऊन काळात स्वयंसेवी संस्था राजकीय पक्ष, नेते, व्यक्‍ती हे त्यांच्यामार्फत फुड पॅकेटस, किराणा किटस, सॅनिटायझर मास्क या स्वरूपाची मदत वाटपाबाबतचे फोटो काढून ते सोशल मीडिया, वर्तमानपत्र, दूरचित्रवाणी यावर प्रसारित करण्यावर प्रतिबंध करण्यात आला आहे. या संदर्भातील आदेश जिल्हाधिकारी राहुल द्विवेदी यांनी काढले आहेत. आदेश मोडला तर कारवाईला सामोरे जावे लागणार आहे. 

शासनाने ‘कोरोना’ विषाणूचा प्रादुर्भाव रोखण्यासाठी राज्यात साथरोग प्रतिबंधात्मक कायद्यामधील तरतुदीनुसार अधिसूचना निर्गमित केलेली आहे. 

‘कोरोना’ विषाणूचा प्रादुर्भाव रोखण्यासाठी करण्यात आलेल्या लॉकडाऊन आदेशामुळे बंद झालेल्या उद्योग व्यवसायातील प्रभावित झालेले कामगार, परराज्यातील विस्थापित कामगार व बेघर व्यक्‍ती यांच्यासाठी निवारागृह, अन्न, पाणी, वैद्यकीय देखभाल या सुविधा स्वयंसेवी संस्थांच्या साहाय्याने केंद्रीय किचन व्यवस्थेच्या माध्यमातून तयार अन्नाचे पुरवठा करण्यात यावे, असा निर्णय घेण्यात आलेला आहे. 

अनेक स्वयंसेवी संस्था, राजकीय पक्ष, नेते, सामाजिक कार्यकर्ते साहित्य, किराणा किटस, सॅनिटायझर मास्क या स्वरूपाची मदत वाटप करीत आहेत. ही मदत वाटप करताना मोठ्या प्रमाणात गर्दी करीत आहेत आणि सोशल डिस्टन्स तत्त्वाचे पालन होताना दिसत नाही. तसेच मदत वाटपाबाबतचे फोटो घेऊन सदरचे फोटो हे सोशल मीडिया, वर्तमानपत्र, दूरचित्रवाणी यावर प्रसारित करीत असल्याचे निदर्शनास आल्याने या संदर्भातील आदेश जारी करण्यात आले आहेत.

कोणत्याही प्रकारची मदत वाटप करण्यापूर्वी नजीकच्या तहसील कार्यालय व पोलीस स्टेशन यांच्याकडून व्यक्‍तिगत व वाहनांचे पासेस प्राप्त करून घ्यावेत. कुठल्याही परिस्थितीत मदत वाटप करणारे व मदत घेणारे यांच्या व्यतिरिक्‍त कोणीही वाटप करताना असू नये. मदत वाटप करणाऱ्यांची संख्या दोन पेक्षा अधिक असू नये. अशा कुठल्याही प्रकारचे मदत वाटपाबाबतचे फोटो प्रसार माध्यमे व सोशल मीडियाव्दारे प्रसारित करू नये. मदत वाटप करताना दोन पेक्षा अधिक व्यक्‍ती आढळल्यास व मदत वाटपाबाबतचे फोटो प्रसार माध्यमे व सोशल मीडियाव्दारे प्रसारित केल्यास फोटोतील सर्व व्यक्‍तींवर कायदेशीर कारवाई करण्यात येईल, असेही आदेशात नमूद करण्यात आले आहे.