परभणी जिल्ह्यात महसूल मंडळे अधिसूचित करणे सुरू

परभणी : जिल्ह्यातील महसूल मंडळांची पुनर्रचना करण्यात आल्यामुळे पीकविमा योजनेच्या अंमलबजावणीसाठी पीकनिहाय मंडळे अधिसूचित करण्याच्या दृष्टीने प्रक्रिया सुरू झाली आहे, अशी माहिती कृषी विभागाच्या सूत्रांनी दिली.

जिल्ह्यातील नऊ तालुक्यांमध्ये यापूर्वी एकूण ३९ महसूल मंडळे अस्तित्वात होती. पुनर्रचना करण्यात आल्यामुळे प्रत्येक तालुक्यातील महसूल मंडळाच्या संख्येत वाढ झाली. त्यामुळे जिल्ह्यातील महसूल मंडळांची संख्या ५२ पर्यंत वाढली आहे. परभणी, सेलू, पाथरी, गंगाखेड, पूर्णा या पाच तालुक्यांत प्रत्येकी १ मंडळाची भर पडली आहे.

जिंतूर, मानवत, सोनपेठ, पालम या चार तालुक्यांत प्रत्येकी दोन नवीन मंडळे अस्तित्वात आली आहेत. त्यामुळे पीकविमा योजनेच्या अंमलबजावणीसाठी, पीककापणी प्रयोगाचे नियोजन करण्यासाठी मंडळनिहाय विविध पिकांचे सर्वसाधारण क्षेत्र निश्चित करण्यात येत आहे. त्यासाठी गेल्या पाच वर्षांतील पेरणी क्षेत्राच्या सरासरीचा आधार घेण्यात आला आहे.

कोणत्याही पिकांचे किमान ३ हजार हेक्टर क्षेत्र असलेली मंडळे अधिसूचित केली जाणार आहेत. त्यापेक्षा कमी क्षेत्र असलेल्या मंडळांचे गट तयार केले जाणार आहेत. तूर्त खरीप हंगामातील पिकांसाठी मंडळे अधिसूचित करण्यासाठी प्रक्रिया सुरू आहे. त्यानंतर रब्बी हंगामातील मंडळे अधिसूचित करण्याचे काम केले जाईल.

जिल्ह्यात २०१८ पर्यंत सोयाबीनसाठी मंडळ गटानुसार पीककापणी प्रयोग घेतले जात होते. परंतु, सोयाबीनच्या क्षेत्रात वाढ झाल्यामुळे पीककापणी प्रयोगाचे अचूक निष्कर्ष काढण्यासाठी २०१९ मध्ये प्रथम सर्व मंडळांत प्रयोग घेण्यात आले. खरीप हंगामातील ज्वारी, भात, सूर्यफूल आदी पिकांचे क्षेत्र कमी झालेली अनेक मंडळे येत्या काळात या पिकांसाठी अधिसूचित राहणार नाहीत, अशी माहिती  मिळाली.