पीककर्ज : महसूल संघटनेचा ‘एसबीआय’ला झटका

पीककर्ज : महसूल संघटनेचा ‘एसबीआय’ला झटका
पीककर्ज : महसूल संघटनेचा ‘एसबीआय’ला झटका

यवतमाळ : स्टेट बॅंक आँफ इंडियामधून महसूल कर्मचारी संघटनेच्या ११३ सभासदांनी वैयक्तिक खाते बंद करून बॅंकेला मोठा झटका दिला. विशेष म्हणजे, सोमवारी (ता. २५) पुन्हा अनेक सभासद ‘एसबीआय’मधील खाते बंद करणार असून त्यानंतर जिल्हाभरात ही मोहीम राबविण्यात येणार असल्याची विश्‍वसनीय सूत्रांची माहिती आहे.

शेतकऱ्यांना कर्जवाटपाची सर्वांत मोठी जबाबदारी भारतीय स्टेट बॅंकेवर आहे. तसे आदेश शासन व जिल्हा प्रशासनाकडून बॅंकेला सातत्याने दिले गेले होते. मात्र, त्यानंतरही बॅंक व्यवस्थापनाकडून शेतकऱ्यांना पीककर्ज वाटपात फारसी सुधारणा झाली नाही. परिणामी, जिल्हाधिकारी डॉ. राजेश देशमुख यांनी ‘एसबीआय’मधील सहा अत्यंत महत्त्वाचे खाते बंद करण्याचा निर्णय घेतला.

शेतकऱ्यांनी जिल्हाधिकाऱ्यांच्या या निर्णयाचे स्वागत केले. महसूल कर्मचारी संघटनेनेसुद्धा पत्र काढत या कारवाईला पाठिंबा दिला. शिवाय, सभासदांना वैयक्तिक खाते बंद करण्याचे आवाहन केले. महसूल कर्मचारी संघटनेच्या या आवाहनाला सभासदांनी पाठिंबा दिला. जिल्हाधिकारी कार्यालयातील आस्थापनेवर असलेल्या तब्बल ११३ कर्मचाऱ्यांनी आपली वैयक्तिक खाते ‘एसबीआय’मधून बंद केली. याच दिवशी सर्व कर्मचाऱ्यांनी युनायटेड बॅंकेत खाती उघडली. विशेष म्हणजे, सोमवारी (ता. २५) उर्वरित कर्मचारीही आपली खाती बंद करणार आहेत. त्यानंतर तालुकास्तरावरील संघटनेचे सभासद खाते बंद करणार असल्याचे महसूल कर्मचारी संघटनेकडून स्पष्ट करण्यात आले आहे. संघटनेच्या या निर्णयामुळे ‘एसबीआय’च्या ठेवीवर मोठ्या प्रमाणात फरक पडणार असल्याची शक्‍यता वर्तविण्यात येत आहे.

‘आम्ही सर्व शेतकरीपुत्र आहोत. शेतकऱ्यांना पीककर्ज देणे आवश्‍यक असतानाही बॅंकेचे अडेलतट्टू धोरण आहे. त्यामुळे आम्ही हे खाते बंद करण्याचा निर्णय घेतला असून कुठे खाते काढायचे हा कर्मचाऱ्यांचा अधिकार आहे.’ - नंदकुमार बुटे, सरचिटणीस, महसूल कर्मचारी संघटना

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com