कृषी विज्ञान केंद्रांच्या कार्याचा ‘क्‍यूआरटी’कडून आढावा

औरंगाबाद : दर पाच वर्षांनंतर येणारी ‘कन्क्‍युनल रिव्हीव्ह टीम'' (क्‍युआरटी) तब्बल आठ वर्षांनंतर औरंगाबाद येथे आली. या क्‍युआरटीने दोन दिवसांपूर्वी मराठवाड्यासह जळगाव, नाशिक येथील १२ कृषी विज्ञान केंद्राच्या कृषी विस्तार व तंत्रज्ञान शेतकऱ्यांपर्यंत पोचविण्याचा कार्याचा आढावा घेतला. 

क्‍युआरटी साधारणत: दर पाच वर्षांनी कृषी विज्ञान केंद्रांच्या कार्याचा आढावा घेऊन तो आयसीआरला सादर करीत असते. प्रत्येक कृषी विज्ञान केंद्र अभीप्रेत दिशानिर्देशानुसार कार्यरत आहे, की नाही याची प्रत्यक्ष स्थिती त्या त्या कृषी विज्ञान केंद्राने राबविलेल्या विविध विषयाच्या माहितीतून जाणून घेणे हा क्‍युआरटीचा मुख्य उद्देश असतो.  २०१०-११ मध्ये क्‍युआरटीने औरंगाबाद येथे कृषी विज्ञान केंद्राच्या कार्याचा आढावा घेतला होता.

मराठवाड्यातील १०, जळगाव व नाशिकमधील प्रत्येकी एक अशा बारा कृषी विज्ञान केंद्रातील विविध विषयानुरूप कार्य अहवाल तयार करण्याच्या कामाला गती आली होती. २६ सप्टेंबरला रांची येथील बी. ए. यू. चे माजी संचालक डॉ. आर. पी. एस. रतन, उदयपूरच्या एपीयूएटीचे माजी संचालक विस्तार शिक्षण डॉ. इंद्रजित माथूर, आयसीआरच्या मत्स्यपालनचे माजी सहाय्यक संचालक डॉ. सुधीर रायझादा यांच्यासह अटारी पुणेचे संचालक डॉ. लखन सिंग हे क्‍युआरटीचे प्रतिनिधी म्हणून दाखल झाले. 

वसंतराव नाईक मराठवाडा कृषी विद्यापिठाचे कुलगुरू डॉ. अशोक ढवण यांच्या अध्यक्षतेखाली दोन दिवस चालणाऱ्या या आढावा बैठकीचे उद्‌घाटन करण्यात आले. अहवाल सादरीकरणामध्ये शेतीमध्ये राबविलेले तंत्रज्ञान, त्याचा स्वीकार, अंमलबजावणीच्या पद्‌धती, त्यामधील अडचणी याचा समावेश राहिला. 

जिल्हा अधीक्षक कृषी अधिकारी डॉ. तुकाराम मोटे, आत्माचे उपसंचालक प्रकाश आव्हाळे यांनीही या पुनरावलोकनात सहभागी होऊन जिल्ह्यातील कृषी विस्ताराची माहिती दिली. शास्त्रज्ञांनी कृषी विज्ञान केंद्राच्या प्रक्षेत्रावरील पिकांची पाहणी केली. इंगोले व कृषी विज्ञान केंद्राच्या प्रमुख प्रा. दिप्ती पाटगावकर यांच्या मार्गदर्शनाखाली नियोजन झाले. डॉ. किशोर झाडे, डॉ. अनिता जिंतूरकर, प्रा. जी. बी. यादव, डॉ. पिसोर, प्रा. निरूवळ आदींनी परिश्रम घेतले.