कोळवण : मुळशी तालुक्यात परतीच्या पावसामुळे भातशेतीचे नुकसान झाले आहे. कापणीयोग्य झालेले पीक शेतात आडवे पडले आहे. त्यामुळे पुढील काळातही नुकसानीची तीव्रता वाढण्याची भीती व्यक्त करण्यात येत आहे. आता भात कापणी हंगाम सुरू होत असताना पावसाचे संकट पुन्हा समोर ठाकल्याने येथील शेतकरी चिंताग्रस्त झाले आहेत.
मुळशी तालुक्यात मागील आठवड्यात अनेक ठिकाणी परतीच्या पावसाने जोरदार हजेरी लावली. दिवसा कडकडीत ऊन पडते. सायंकाळी मात्र अचानक आभाळ भरून येऊन जोरदार वाऱ्यासह पावसाच्या सरी कोसळत आहेत. विजेच्या कडकडाटासह जोरदार पाऊस पडत असल्यामुळे परिसरातील ओढे- नाल्यांना मोठा पूर आला. परतीच्या या पावसाचा भातशेतीवर मात्र प्रतिकूल परिणाम झाला आहे. कापणीयोग्य पीक शेतात आडवे झाल्याने उत्पादनात घट येण्याचा धोका निर्माण झाला आहे.
पीक शेतात आडवे झाल्यामुळे दाणे गळ होऊन पुढील काळात नुकसानीची तीव्रता वाढण्याची शक्यता आहे.
सातगाव पठार परिसरात मुसळधार; शेतीकामे रखडली
सातगाव पठार : परिसरात गुरुवारी (ता. १०) सायंकाळी ५ ते ६ वाजण्याच्या दरम्यान व रात्री ९ ते पहाटे ५ वाजेपर्यंत मुसळधार पाऊस झाला. त्यामुळे परिसरातील कांदा, मका आदी पिकांचे काही प्रमाणावर नुकसान झाले आहे. बहुतांश शेतकऱ्यांची शेतीची कामे रेंगाळली आहेत.
सातगाव पठार भागातील पेठ, कारेगाव, भावडी, थुगाव, कोल्हारवाडी, कुरवंडी आदी गावांत गुरुवारी रात्री पावसाने जोरदार हजेरी लावली. या परिसरातील काही शेतकऱ्यांनी आपल्या शेतात मका लागवड केली आहे. हे मक्याचे पीक पावसाच्या जोरदार माऱ्यामुळे खाली पडले आहे. तसेच शेतांत पाणी साचून नुकतीच लागवड केलेली कांदा रोपे काही ठिकाणी पाण्याखाली गेली होती. त्यामुळे कांदा पीक हातचे जाते की काय? अशी चिंता या भागातील शेतकऱ्यांना आहे. मात्र पावसाने उघडीप दिल्याने तुर्तास तरी या संकटातून शेतकऱ्यांना दिलासा मिळाला आहे.
थंडी, ऊन अन् ढगांचा खेळ
सातगाव पठार भागात सध्या पहाटे थंडी असते. दुपारच्या वेळेस प्रचंड मोठ्या प्रमाणावर उष्णता जाणवत आहे. संध्याकाळी मात्र आकाशात काळे ढग जमा होऊन पावसाचे वातावरण तयार होत आहे. त्यामुळे शेतकऱ्यांमध्ये चिंतेचे वातावरण आहे. शेतीची कामे दिवस मावळायच्या आत उरकण्याकडे शेतकरी भर देत असल्याचे कारेगाव (ता. आंबेगाव) येथील प्रगतशील शेतकरी उल्हास घेवडे यांनी सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.