रत्नागिरी जिल्ह्यात भातशेतीचे नुकसान

रत्नागिरी ः राजापूर तालुक्यातील अर्जुना, मुचकुंदी नद्यांना आलेल्या पुरात किनाऱ्यावरील शेकडो एकर भातशेती बाधित झाली आहे. शेताच्या बांधावर जाऊन भातशेतीच्या नुकसानीचे सर्वेक्षण करा, अशा सूचना तहसीलदार प्रतिभा वराळे यांनी दिल्या आहेत.  तालुक्यातून वाहणाऱ्या अर्जुना आणि मुचकुंदी नद्यांना काही दिवसांपूर्वी पूर आला होता. सलग पाच दिवस राहिलेल्या पूरस्थितीने तालुक्यात विविध प्रकारचे मोठ्या प्रमाणात नुकसान झाले आहे. त्यात भातशेतीचाही समावेश आहे. नद्यांना आलेल्या या पुरामध्ये काठावरील शीळ, गोठणेदोनिवडे, चिखलगाव, गोवल, शिवणे, हर्डी, शुक नदीच्या काठावरील प्रिंदावण, वाल्ये, शेजवली आदी गावांमधील भातशेती पुराच्या पाण्याखाली होती. काठावरील ही भातशेतीची नुकतीच लावणी झाली होती. भाताची रोपे पाच दिवस पाण्याखाली राहिल्याने अनेक भागांत ती कुजली आहेत. काही भागांत रोपे वाहून गेली आहेत. काही ठिकाणी पुरासोबत वाहून आलेल्या चिखलामध्ये ती गाडून गेली होती. त्यातून अनेक गावांमधील शेकडो एकर भातशेती बाधित झाली आहे. पुरामुळे झालेल्या भातशेतीच्या नुकसानीचे शासनाकडून भरपाई मिळावी, अशी मागणी शेतकऱ्यांकडून केली जात आहे. तहसीलदार श्रीमती वराळे याच्या सूचनेनुसार महसूल प्रशासनातर्फे गावोगावी जाऊन लोकांशी संवाद साधून शेतीसह अन्य झालेल्या नुकसानीचे सर्वेक्षण करण्याचे काम हाती घेण्यात आले आहे. पंचायत समितीचे गटविकास अधिकारी सागर पाटील यांच्या सूचनेनुसार आणि तालुका कृषी अधिकारी जगताप यांच्या मार्गदर्शनाखाली कृषी विभागानेही शेतीच्या नुकसानीच्या सर्वेक्षणाचे काम हाती घेतले आहे. नुकसानीच्या सर्वेक्षणात शेतकरी वंचित राहणार नाहीत, अशा सूचना आमदार राजन साळवी यांनी प्रशासनाला केली आहे. याबाबत संतोष हातणकर म्हणाले, की पूरस्थितीत नुकसान झालेल्या काही गावांमध्ये मूळ जमीनमालक एक आहे आणि जमीन कसणार शेतकरी वेगळा अशी स्थिती आहे. त्यामुळे जमीन मालकांना अनेकवेळा नुकसानभरपाई मिळते. प्रत्यक्षात जमीन कसणारे शेतकरी वंचित राहतात. याचा विचार होऊन प्रत्यक्षात शेती करणाऱ्या शेतकऱ्याला नुकसानभरपाई मिळावी.