देशात सेंद्रिय उत्पादन कमीच ः रीता टेओटिया

पणजी: देशात सेंद्रिय उत्पादनांना ग्राहक वाढला असला तरीही उत्पादन मात्र कमीच आहे. या उत्पादनाला प्रोत्साहन देण्यासाठी केंद्रिय कृषी मंत्रालयाने सहभागी हमी योजना सुरू केली आहे. या योजनेमुळे सेंद्रिय उत्पादन वाढेल, असे भारतीय अन्न सुरक्षितता आणि मानके प्राधिकरणच्या (एफएसएसएआय) अध्यक्षा रीता टेओटिया म्हणाल्या. सहभागी हमी योजना (पीजीएस) ही सेंद्रिय उत्पादनांना प्रमाणित करण्याची पध्दत आहे. कृषी उत्पादन करताना प्रमाणित मानके आणि आवश्‍यक गुणवत्ता राखली गेली त्या उत्पादनांना प्रमाणित करण्यात येते. हे लोगो किंवा स्टेटमेंटच्या स्वरूपात प्रदर्शित करण्यात येते. ‘‘देशात प्रमाणित सेंद्रिय अन्न उत्पादनाचे प्रमाणे खूपच कमी आहे. केंद्र सरकारने सुरू केलेल्या ‘पीजीएस’ योजनेमुळे सेंद्रिय उत्पादन घेणारे शेतकरी एकत्र येतील त्यांचा गट तयार होईल यामुळे त्यांचा उत्पादन खर्चही कमी होईल. यामुळे सेंद्रिय उत्पादनालाही चालना मिळेल. ‘एफएसएसएआय’च्या माध्यमातून देशात सेंय उत्पादनाखालील क्षेत्रात वाढ होईल,’’ असे टेओटीया यांनी सांगितले.   ‘एफएसएसएआय’ करत असलेल्या अन्न चाचणीविषयी बोलताना त्या म्हणाल्या, ‘‘तीन चतुर्थांश नमुने हे खाण्यासाठी अयोग्य आढळले आहेत.’’