पुण्यात गुलाब प्रदर्शनास प्रारंभ

पुणे ः दि रोझ सोसायटी आॅफ पुणे या संस्थेतर्फे दोनदिवसीय गुलाब प्रदर्शनाला पुण्यातील टिळक स्मारक मंदिर येथे शनिवारी (ता. ५) प्रारंभ झाला. प्रदर्शनामध्ये राज्यभरातील गुलाब उत्पादक तसेच हौशी गुलाबप्रेमींनी २५०० गुलाबांची फुले मांडली होती. 

या प्रदर्शनाचे उद्‌घाटन ‘एसआरपीएफ’च्या डीआयजी अर्चना त्यागी यांच्या हस्ते झाले. या वेळी टिळक महाराष्ट्र विद्यापीठाचे कुलगुरू डॉ. दीपक टिळक उपस्थित होते. प्रदर्शनामध्ये एकूण ७३ विभागांमध्ये गुलाब प्रदर्शित करण्यात आले होते. प्रदर्शनामध्ये संस्थेच्या उपाध्यक्षा सौ. भाग्यश्री टकले यांना कै. लक्ष्मीबाई अनंत नाईक रौप्य पदक आणि लातूर जिल्ह्यातील कृष्णा उपाडे यांना गुणवंत गुलाब उत्पादक शेतकरी पुरस्काराने सन्मानित करण्यात आले. आज (रविवारी) प्रदर्शनाचा समारोप होत आहे.