बुलडाण्याचा ३५१ कोटींचा प्रारूप आराखडा मंजूर

बुलडाणा :  सन २०१९-२० साठी जिल्हा नियोजन समितीच्या माध्यमातून शासनाने घालून दिलेल्या वित्तीय मर्यादेत ३५१ कोटी रुपयांचा प्रारूप आराखडा तयार करण्यात आला आहे. सर्वसाधारण योजनेचा २१० कोटी १३ लाख, अनुसूचित जाती उपाययोजनेचा १२३ कोटी ५७ लाख आणि आदिवासी उपयोजनेसाठी १७ कोटी ३९ लाख रुपयांचा त्यामध्ये समावेश आहे. 

समितीने प्रस्तावित केलेल्या आराखड्यामधून विकासाची व जनकल्याणाची कामे मोठ्या प्रमाणावर व्हावीत, अशी अपेक्षा पालकमंत्री मदन येरावार यांनी व्यक्त केली. जिल्हा नियोजन समितीच्या बैठकीत ते बोलत होते. खासदार प्रतापराव जाधव, रक्षा खडसे, जिल्हा परिषद अध्यक्षा उमा तायडे, आमदार चैनसुख संचेती, जिल्हाधिकारी डॉ. निरूपमा डांगे, मुख्य कार्यकारी अधिकारी एस. षण्मुखराजन, जिल्हा पोलिस अधीक्षक डॉ. दिलीप पाटील- भुजबळ, जिल्हा नियोजन अधिकारी विजय शिंदे आदी उपस्थित होते. 

पालकमंत्री येरावार म्हणाले, इंग्रजकालीन व तहसीलदारांनी अतिक्रमण मुक्त केलेल्या पाणंद रस्त्यांचा प्राधान्याने विकास करण्यात येणार आहे. त्यासाठी राज्य स्तरावर मोहीम स्वरूपात कार्यवाही सुरू आहे. जिल्ह्यात जनसुविधेच्या माध्यमातून ग्रामपंचायत स्तरावर अनेक छोटी-मोठी कामे होत असतात. जिल्हा नियोजन समितीच्या माध्यमातून जिल्हा परिषदेला निधी देण्यात येतो. या निधीचा सविस्तर आढावा होणे गरजेचे आहे. या निधीतून अंदाज पत्रकानुसार खर्च आहे किंवा नाही, याबाबत तपासणी करण्यात यावी.

मागील काही वर्षांमध्ये पूर्वसंमती न घेता सूक्ष्म सिंचन संच खरेदी केले. याबाबत प्राप्त शेतकऱ्यांच्या अर्जांवर अनुदान मिळण्यासाठी प्रयत्न होतील. पशुसंवर्धन विभाग व जिल्हा प्रशासनाने चाऱ्याची टंचाई निर्माण न होण्यासाठी कार्यवाही करावी. मुबलक चारा उपलब्ध राहील याबाबत काळजी घ्यावी, असेही ते म्हणाले.

चुकारे देण्यासाठी सूचना जिल्ह्यात शासनामार्फत नाफेडच्या माध्यमातून तूर व हरभरा खरेदी करण्यात आली. याबाबत शेतकऱ्यांनी ऑनलाइन नोंदणी केली. मात्र काही शेतकऱ्यांच्या बाबतीत ऑनलाइन नोंदणी नावांचे लॉट ''एन्ट्री'' व्यवस्थित न गेल्यामुळे शेतकरी चुकाऱ्यांपासून वंचित असल्याचे निदर्शनास आले. याबाबत तुरीवरील अनुदान व चुकाऱ्यांसाठी जिल्हाधिकारी व जिल्हा उपनिबंधक यांनी कार्यवाही करावी. पात्र शेतकरी अनुदानापासून वंचित राहू नये. दोषींवर कडक कारवाई करण्यात यावी, अशी सूचनाही येरावार यांनी केली.