इथेनॉलनिर्मितीसाठीच्या कर्जासाठीचे निकष शिथिल करण्याचा विचार

इथेनॉलनिर्मितीसाठीच्या कर्जासाठीचे निकष शिथिल करण्याचा विचार
इथेनॉलनिर्मितीसाठीच्या कर्जासाठीचे निकष शिथिल करण्याचा विचार

नवी दिल्ली: केंद्र सरकार साखर कारखान्यांना इथेनॉलनिर्मिती क्षमता वाढविण्यासाठी कर्ज उपलब्ध करून देण्यासाठीचे निकष शिथिल करण्याच्या विचारात आहे. या कर्जावरील व्याजसवलतीचा लाभ घेण्यासाठीची कमाल मर्यादा उठवण्याचा निर्णय घेतला जाऊ शकतो, असे सूत्रांनी सांगितले. सरकाराने १९ जुलै रोजी काढलेल्या अधिकृत नोटिफिकेशनमध्ये व्याज सवलतीसाठी ८० कोटी रूपयांची कमाल मर्यादा जाहीर केली होती.   

तसेच सरकारने थेट उसाच्या रसापासून तयार करण्यात येणाऱ्या इथेनॉलला २०१८-१९ या हंगामासाठी प्रतिलिटर ४७.४९ रूपये इतका वाढीव दर जाहीर केला आहे. तर प्रचलित पद्धतीनुसार साखर तयार केल्यानंतर उरलेल्या मोलॅसिसपासून तयार होणाऱ्या इथेनॉलला प्रति लिटर ४३.७० रूपये दर मिळणार आहे. सरकारच्या या निर्णयामुळे थेट उसाच्या रसापासून इथेनॉलनिर्मितीला प्रोत्साहन मिळणार आहे. उसाचा अतिरिक्त पुरवठा आणि साखरेच्या दरातील घसरण अशी परिस्थिती ओढवल्यास कारखाने साखर तयार करण्याऐवजी थेट इथेनॉल निर्मितीला प्रोत्साहन देतील. सध्या जगात ब्राझील या देशात ही पध्दत अवलंबली जाते. साखरेचे दर कोसळल्यास थेट इथेनॉलनिर्मितीसाठी प्रोत्साहन देण्याचे ब्राझील सरकारचे धोरण आहे.

सरकारने इथेनॉलसाठी दुहेरी दर प्रणाली अवलंबण्याचा निर्णय घेतला असल्यामुळे काही प्रश्न निर्माण होण्याचीही शक्यता अाहे, असे सूत्राने सांगितले. या प्रणालीमुळे अंतिम उत्पादन (इथेनॉल) एकच मिळणार असले तरी त्याचे दर वेगवेगळे राहणार आहेत. त्याचा गैरफायदा घेतला जाण्याची शक्यता असल्याचे या सूत्राने स्पष्ट केले. यावर उपाय म्हणून थेट उसाच्या रसापासून बनवलेले इथेनॉल आणि प्रचलित पद्धतीनुसार तयार केलेले इथेनॉल एकमेकांपासून वेगळे ओळखू येण्यासाठी कारखानास्तरावरच काही मार्ग काढण्याची आवश्यकता आहे, असे या सूत्राने सांगितले.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com