निशिगंधाच्या नवीन वाणाचे नामकरण ‘सह्याद्री वामन’

पुणे ः पुष्पसंशोधन संचालनालयाच्या वतीने विकसित करण्यात आलेल्या लहान दांडी असणाऱ्या आणि कुंड्यांसाठी उपयुक्त असलेल्या निशिगंधाच्या वाणाचे नामकरण ‘सह्याद्री वामन’ करण्यात आले आहे. संचालनालयाच्या वर्धापन दिनानिमित्त भारतीय कृषी संशोधन परिषदेचे उपसंचालक डॉ. ए. के. सिंह यांच्या ऑनलाइन उपस्थितीत वाणाचे लोकार्पण करण्यात आले.  संचालनालयाचा ११ वा वर्धापन दिन गुरुवारी (ता. १०) ऑनलाइन पद्धतीने साजरा झाला. या वेळी भारतीय कृषी संशोधन परिषदेचे उपसंचालक डॉ. ए. के. सिंह, पुष्पसंशोधन संचालनालयाचे संचालक डॉ. के. व्ही. प्रसाद ‘आयसीएआर’चे फलोत्पादन विभागाचे सहायक उपनिरीक्षक डॉ. विक्रमादित्य पांडे डॉ. बी. के. पांडे, राष्ट्रीय द्राक्ष संशोधन संचालनालयाचे डॉ. आर. जी. सोमकुंवर, कांदा लसूण संचालनालयाचे डॉ. मेजर सिंग, अटारीचे संचालक डॉ. लखन सिंग, बिकानेरच्या केंद्रीय शुष्क बागवानी संशोधन केंद्राचे डॉ. पी. एल. सरोज, तेलताड संशोधन संस्थेचे डॉ. आर. के. माथूर, राज्यातील कृषी विद्यापीठाचे कुलगुरू अनुक्रमे कोकण कृषी विद्यापीठाचे डॉ. एस. डी. सावंत, पंजाबराव देशमुख मराठवाडा विद्यापीठाचे डॉ. वि. एम. भाले, राहुरी कृषी विद्यापीठाचे कुलगुरू डॉ. अशोक धवन यांच्यासह विविध संस्थांचे माजी संचालक, शास्त्रज्ञ, अखिल भारतीय समन्वय संशोधन प्रकल्प-पुष्प अंतर्गतचे वैज्ञानिक उपस्थित होते.  या वेळी झालेल्या चर्चेमध्ये फुलांचे दैनंदिन जीवनातील महत्त्व, औद्योगिक आणि आर्थिक संधी याबद्दल सविस्तर चर्चा करण्यात आली.

फुल शेती ठरतेय पर्याय  फुलांची राष्ट्रीय आणि आंतरराष्ट्रीय पातळीवरील मागणी वाढत असताना, नवनवीन वाण बाजारपेठेत आणण्यासाठी पुष्पसंशोधन संचालनालय प्रयत्न करत आहे. या प्रयत्नांना यश मिळत असून, नवनवीन वाण शेतकऱ्यांना देखील पर्याय ठरत असून, फूल शेतीमध्ये संधी उपलब्ध होत आहेत. औद्योगिक क्षेत्रासाठी देखील फुलांची मागणी वाढत असताना, शेतकऱ्यांना पारंपरिक शेतीला फूल शेती पर्याय ठरत आहे, असे डाॅ. ए. के. सिंह यांनी सांगितले