साखर कामगारांच्या वेतनवाढीसाठी त्रिपक्षीय समिती स्थापन करा

पुणे ः राज्यातील साखर उद्योगातील कामगारांच्या कराराची मुदत ३१ मार्च २०१९ रोजी संपली आहे. एक एप्रिलपासून राज्यातील साखर उद्योगातील कामगारांचे वेतनवाढ व सेवा शर्ती ठरविण्यासाठी तातडीने त्रिपक्षीय समिती स्थापन करून कामगारांना नवीन चाळीस टक्के वेतनवाढीचा लाभ मिळावा, अशी मागणी महाराष्ट्र राज्य राष्ट्रीय साखर कामगार फेडरेशन (इंटक)ने सोमवारी (ता. २६) राज्याचे साखर आयुक्त शेखर गायकवाड यांच्याकडे निवेदनाद्वारे केली. 

या वेळी महाराष्ट्र राज्य राष्ट्रीय साखर कामगार फेडरेशनचे (इंटक) उपाध्यक्ष रामनाथ गरड, खजिनदार दत्तात्रेय निमसे, संपर्कप्रमुख सुखदेव फुलारी, अशोकराव पवार, भाऊसाहेब चौधरी, बापूसाहेब सुपारे, मच्छिंद्र वेताळ, संभाजी माळवदे, संजय राऊत, अण्णासाहेब गर्जे, प्रसाद गरड, सोमनाथ कावळे, अशोक संधान, अशोक भालेराव, मोहन पालाने, सुभाष सोनवणे, सदाभाऊ दरंदले, डी. जी. म्हस्के, कानिफनाथ सोनवणे, शिवाजी शिंदे, रामकिसन पालवे, अप्पासाहेब बोडखे आदी उपस्थित होते.

महाराष्ट्र राज्य राष्ट्रीय साखर कामगार फेडरेशनचे (इंटक) सरचिटणीस नितीन पवार म्हणाले, की ‘‘त्रिपक्षीय समिती स्थापन करून साखर कामगारांना चाळीस टक्के वेतनवाढ मिळावी, वेतनवाढीचा अंतिम निर्णय होईपर्यंत पाच हजार रुपये हंगामी वेतनवाढ लागू करावी, या व इतर मागण्यांची नोटीस देऊन चार महिन्यांचा कालावधी उलटला आहे. तरीसुद्धा याबाबत निर्णय झालेला नाही.