यवतमाळात एक लाख लिटर ‘ग्लायफोसेट'ची विक्री

यवतमाळ  :  ग्लायफोसेट तणनाशकाची जिल्ह्यात  मोठ्या प्रमाणात विक्री सुरू आहे. जून ते सप्टेंबर या चार महिन्यांत एक लाख लिटरपेक्षा जास्त विक्री होत असल्याने ही चिंतेची बाब ठरली आहे. या  तणनाशकांची शिफारस चहामळ्यासाठी असूनही खरीप हंगामात एवढ्या मोठ्या प्रमाणात वापर होत अाहे. त्यामुळे कृषी संचालकांनी या संदर्भाने चौकशीचे आदेश दिल्याने कृषी व्यावसायिकांचे धाबे दणाणले आहेत. अनेकांनी आपल्याकडील माल वितरकाला परत पाठविण्यावर भर दिला आहे.

ग्लायफोसेट तणनाशक कार्सिनोजनिक गुणधर्माचे आहे. त्यांचा वापर मानवी आरोग्यासाठी घातक ठरण्याची शक्‍यता व्यक्त केली आहे. या तणनाशकाचा वापर पिके नसलेल्या जमिनीवर व चहामळ्यासाठी करण्याची शिफारस  केंद्रीय कीटकनाशके मंडळ व नोंदणी समिती फरिदाबाद यांनी केली आहे.

ग्लायफोसेट विक्री करणाऱ्या लहान-मोठ्या ३० ते ४० कंपन्या आहेत. काही नामांकित कंपन्यांची मागणी जास्त    असून लहान कंपन्यांचीसुद्धा तणनाशके बाजारात दाखल झाली आहेत. पेरणी झाल्यानंतर ग्लायफोसेटचा वापर होत असल्याने यावर प्रतिबंध घालण्याबाबत कृषी आयुक्तालयात सुनावणी सुरू आहे. त्यात यावर निर्बंध येण्याची दाट शक्‍यता आहे. त्यामुळे विक्रेत्यांमध्ये खळबळ उडाली असून, ग्लायफोसेट परत करण्यासाठी घाऊक, किरकोळ विक्रेत्यांनी धावाधाव सुरू केली आहे.

दक्षता घेण्याचे आदेश केंद्रीय कीटकनाशके मंडळ व नोंदणी समितीने दिलेल्या शिफारशी व्यतिरिक्त इतर बाबींसाठी जिल्ह्यात ग्लायफोसेटचा वापर होणार नाही, याची कटाक्षाने दक्षता घ्यावी, असे आदेश कृषी संचालकांनी दिले आहेत.