सांगली जिल्हास्तरीय तांत्रिक समितीची पीक कर्जमर्यादेत वाढीची शिफारस

सांगली :  शेतकऱ्यांना २०२२-२३ या हंगामात दिल्या जाणाऱ्या पीककर्जाच्या मर्यादेत वाढ करण्यासाठी राज्यस्तरीय समितीकडे शिफारस करण्याचा निर्णय घेण्यात आला.

यंदाच्या २०२२-२३ या हंगामासाठी राज्यस्तरीय समितीकडे शिफारस केलेला पीक कर्जदर शेतकऱ्यांना पुरवठा करण्यासाठी, हंगामाचे पीक कर्जदर व धोरण ठरविण्यासाठी जिल्हा बँकेत जिल्हास्तरीय तांत्रिक समितीची सभा झाली. अध्यक्षस्थानी जिल्हाधिकारी अभिजित चौधरी होते. ‘नाबार्ड’चे जिल्हा विकास व्यवस्थापक एल. पी. धानोरकर, लीड बँकेचे महेश हरणे, जिल्हा बँकेचे मुख्य कार्यकारी अधिकारी जयवंत कडू आदी उपस्थित होते. 

जिल्ह्यातील पीक परिस्थिती, पाऊसमान, हवामान, भौगोलिक परिस्थिती, पीक उत्पादनासाठी येणारा खर्च, त्याला मिळणारा दर आदीची चर्चा झाली. या बाबींचा विचार करून पिकांच्या पीक कर्जदरात वाढ करावी, यासाठी राज्यस्तरीय समितीकडे शिफारस करण्याचा निर्णय घेण्यात आला. कर्जदराला मान्यता मिळण्यासाठीचा प्रस्ताव तत्काळ राज्यस्तरीय तांत्रिक समितीकडे पाठवला जाणार आहे. तेथून मान्यता आल्यानंतरच सुधारित पीक कर्जदार लागू केला जाणार आहे.

  ...असे आहेत कर्जदर

जिल्हास्तरीय समितीने केलेल्या शिफारशीनुसार कर्जदर (एकरी) भात, सुधारित २० हजार रुपये, भात जिराईत, २० हजार रुपये, भात बासमती २० हजार रुपये, उडीद जिराईत आठ हजार ८०० रुपये, सोयाबीन २० हजार रुपये, सूर्यफूल (बागायत)- १० हजार रुपये, कापूस बागायत २२ हजार रुपये, ऊस सुरू ५० हजार रुपये, आडसाली ५६ हजार रुपये, पूर्वहंगामी ५० हजार रुपये, खोडवा ५० हजार रुपये, ज्वारी बागायत १४ हजार रुपये, द्राक्ष (थॉमसन सीडलेस) एक लाख ३० हजार रुपये, तुती लागवड सहा हजार रुपये या प्रमाणे शिफारस केली आहे. नागपुरी किंवा पंढरपुरी म्हैस एक युनिट १२ हजार रुपये मेहसाना म्हैस किंवा संकरित गायीचे एक युनिट १४ हजार रुपये या प्रमाणे कर्जदराची शिफारस केली आहे.