सांगलीत गूळ प्रतिक्विंटल २८०० ते ३००० रुपये

सांगली : येथील बाजार समितीत मंगळवारी (ता. ३०) गुळाची १११८ क्विंटल आवक झाली असून, त्यास प्रतिक्विंटल २८०० ते ३००० तर सरासरी ३१५० रुपये असा दर मिळाला. हळदीचे सौदे आठवड्यातून दोन वेळा होत आहेत, अशी माहिती बाजार समितीच्या सूत्रांनी दिली.

बाजार समितीच्या आवारात तांदळाची २४० क्विंटल आवक झाली होती. तांदळास प्रतिक्विंटल २२०० ते ६००० तर सरासरी ४१०० रुपये असा दर मिळाला. बाजरीची १३० क्विंटल आवक झाली होती. बाजरीस प्रतिक्विंटल २४०० ते २५०० तर सरासरी २४१० रुपये असा दर मिळाला. ज्वारी (हायब्रिड)ची २२० क्विंटलची आवक झाली असून, त्यास प्रतिक्विंटल २४३० ते २८०० तर सरासरी २६१५ असा दर होता. ज्वारी (शाळू)ची ३५० क्विंटलची आवक झाली असून, त्यास प्रतिक्विंटल ३००० ते ४५०० तर सरासरी ३७५० असा दर होता.

विष्णूअण्णा पाटील फळे व भाजीपाला दुय्यम बाजार आवारात कांद्याची ७८५ क्विंटल आवक झाली असून, त्यास प्रतिक्विंटल ५५० ते १६५० तर सरासरी ११०० रुपये असा दर मिळाला. बटाट्याची १६० क्विंटलची आवक झाली होती. बटाट्यास प्रतिक्विंटल ७०० ते ११०० तर सरासरी ९०० रुपये असा दर होता. डाळिंबाची आवक वाढली असून, ४०८० किलोची आवक झाली होती. डाळिंबास प्रति दहा किलोस ५०० ते ८०० रुपये असा दर मिळाला. लसणाची १९५ क्विंटल आवक झाली असून, त्यास प्रतिक्विंटल ३००० ते ६००० तर सरासरी ४७५० रुपये असा दर मिळाला. अननसाची १७२ डझन आवक झाली होती. प्रतिडझनास २०० ते ६०० रुपये असा दर होता. सफरचंदाची ४५५ पेट्यांची आवक झाली असून, त्यास प्रतिपेटीस १००० ते ३००० रुपये असा दर मिळाला.

शिवाजी मंडईत वांग्याची २०० ते २५० क्रेटची आवक झाली असून, त्यास प्रति दहा किलोस ३०० ते ४०० रुपये असा दर मिळाला. मिरचीची ५०० ते ६०० पिशवीची आवक झाली होती. मिरचीस प्रति दहा किलोस ३०० ते ३५० रुपये असा दर मिळाला. ढोबळी मिरचीची ५०० पिशवीची आवक झाली असून, त्यास प्रति दहा किलोस २०० ते २५० रुपये असा दर होता.