संत गजानन महाराज प्रकट दिन उत्साहात साजरा

शेगाव, जि. बुलडाणा ः विदर्भाच्या पंढरीत शनिवारी (ता.१५) संत गजानन महाराज यांच्या १४२ व्या प्रगट दिनी लाखो भाविकांनी गर्दी केली. भाविकांच्या अलोट उपस्‍थित गजानन महाराजांचा प्रगट दिन सोहळा झाला. शहरात सर्वत्र ‘गण गण गणात बोते’चा गजर सुरू होता. प्रगट दिनानिमित्त गेल्या तीन चार दिवसांपासून राज्यातील दिंड्याचे शेगावमध्ये आगमन सुरू झाले होते. प्रगटदिन सोहळ्याच्या अनुषंगाने सुरू असलेल्या महारूद्र स्वाहाकार यागाची पूर्णाहुती व ब्रह्मवृंदाच्या उपस्थित अवभृतस्नान सकाळी १० वाजता झाले. यानंतर दुपारी २ वाजता श्रींच्या रजत मुखवट्यासह पालखी सोहळा निघाला. यात घोडे, हत्ती, सजवलेला रथ, मेणा, शेकडोच्या संख्येत भगवे पताकाधारी, राज्यभरातून आलेले वारकरी सहभागी झाले.  पालखी सोहळा मंदिर परिसर, जुने महादेव मंदिर परिसर, संत सावता चौक, तीन पुतळे, फुले नगर, तेलीपुरा, बंकट सदन, फरशीवेस, स्वामी विवेकानंद चौक, भैरव चौक, आठवडी बाजार, बसस्थानक मार्गे, महाराजा अग्रसेन चौक, शिवाजी महाराज चौक, लोकमान्य टिळक चौक, गांधी चौक, जुने मंदिर रोड मार्गे नगर परिक्रमाकरिता श्रींचा पालखी सोहळा मार्गस्थ झाला होता. सायंकाळी उशिरा पालखी मंदिरात परतली.  उत्सवाची उद्या सांगता रविवारी (ता. १६) सकाळी ७ ते ८ यावेळेत हरीभक्त परायण प्रमोदबुवा राहणे (पळशी) यांचे काल्याचे कीर्तन होईल. यानंतर प्रगट दिन उत्सवाची सांगता होणार आहे. शनिवारी पालखीमार्गावर चौकाचौकात रांगोळ्या काढण्यात आल्या होत्या. भाविकांनी पालखीवर फुलांची उधळण केली. ठिकठिकाणी भाविकांसाठी विविध सोयी-सुविधांची दालने उघडण्यात आली होती. विविध जाती-धर्माच्या लोकांनी यात उत्स्फूर्त सहभाग घेतला.