कर्नाटक, आंध्रात कोल्हापूरच्या गुलाब, जरबेराला उच्चांकी दर

कोल्हापूर : देशात पावसामुळे फूल उत्पादनात व्यत्यय आल्याने फुलांचे दर चांगलेच वाढले आहेत. कर्नाटक, आंध्र प्रदेशच्या बाजारपेठेत जिल्ह्यातील जरबेरा, गुलाब आदी फुलांचे भाव तेजीत आहेत. जरबेरा, गुलाबाची सात ते आठ रुपये इतक्‍या उच्चांकी दराने विक्री होत आहे. गणेशोत्सवापर्यंत हे दर चांगले राहतील, अशी शक्‍यता बाजारपेठेतील सूत्रांची आहे.

कोल्हापूर जिल्ह्यातून बंगळूर, हैदराबाद या मोठ्या बाजारपेठांमध्ये दररोज सुमारे दीड ते दोन लाख जरबेरा व तितक्‍याच प्रमाणात गुलाब फुले पाठविली जातात. या फुलांना या बाजारपेठेत सरासरी २ ते ४ रुपये प्रतिफूल असा दर मिळतो. पण, गेल्या आठ दिवसांपासून या फुलांच्या दरात चांगलीच वाढ झाली आहे.

देशात अनेक ठिकाणी पूरस्थिती आहेत. स्थानिक बाजारपेठेच्या नजीकच्या गावांमध्ये फूल उत्पादनासाठी प्रतिकूल परिस्थिती बनली आहे. सूर्यप्रकाशाअभावी फुलाचे उत्पादन घटल्याने या भागातून या बाजारपेठांकडे जाणारा फुलांचा ओघ घटला आहे. यामुळे मागणी कायम राहिली आहे. कर्नाटक आंध्रमध्ये उत्सवाचे दिवस सुरू आहे. शुक्रवारी होणाऱ्या लक्ष्मीपूजन व अन्य देवतांच्या पूजेसाठी फुलांची मोठी गरज लागते. यामुळे फुलांना दररोज मागणी असल्याचे फूल उत्पादकांनी सांगितले.

गेल्या चार दिवसांपासून सर्वच फुलांचे दर वाढले आहेत. काही कालावधीकरिता तरी हे दर चांगले रहातील अशी शक्‍यता आहे. - रमेश पाटील, व्यवस्थापक, श्रीवर्धन बायोटेक, कोंडिग्रे

गणेशोत्सवापर्यंत दर टिकून राहण्याची शक्‍यता सध्या कर्नाटक  आंध्रात उत्सव सुरू असल्याने या भागात फुलाला मागणी आहे. या उलट मुंबई बाजारपेठेत फारशी मागणी नाही, यामुळे दरही कमी आहेत. गणेशोत्सवापर्यंत बाहेरील राज्यातील मागणी वाढलेली राहील. गणेशोत्सव सुरू झाला, की मुंबईच्या बाजारपेठेत पुन्हा दर वाढण्याची शक्‍यता आहे. यामुळे सप्टेंबर महिना फूल उत्पादकांच्या दृष्टीने दिलासादायक जाण्याची शक्‍यता आहे.