सातारा जिल्हा बँकेतर्फे १३४ टक्के पीककर्ज वाटप

सातारा : जिल्हा वार्षिक पत आराखाड्यात २०२०-२१ करिता जिल्ह्याचे एकूण पीककर्ज वाटप उद्दिष्ट २२०० कोटी पैकी सातारा जिल्हा बँकेचे १३०० कोटींचे उद्दिष्ट आहे. त्यामध्ये खरीप पिकासाठी निश्चित केलेले ९५० कोटी असून आजअखेर २ लाख २६,७१३ शेतकरी सभासदांना १२७८ कोटी इतके कर्ज वाटप झाले आहे. उद्दिष्टाचे १३४ टक्के पूर्तता करून पीककर्ज वितरण करण्यात आल्याने बँकेने उल्लेखनीय काम केले असल्याचे अध्यक्ष आमदार शिवेंद्रसिंहराजे भोसले यांनी सांगितले.

जिल्ह्याच्या कृषी व ग्रामीण विकासासाठी कटिबद्ध असणारी सातारा जिल्हा मध्यवर्ती सहकारी बँक ग्राहकांना ३२० शाखा व ९५३ विकास सेवा संस्थांच्या माध्यमातून बँकिंग सुविधा पुरविण्याचे निरंतर कार्य करीत आहे. बँकेच्या वसुली यंत्रणेच्या विनंतीस प्रतिसाद देऊन बँकेशी बांधीलकी असलेल्या या जिल्ह्यातील शेतकरी वर्गाने प्रामाणिकपणे शेती कर्जाची वेळेत परतफेड केली आहे. याचाच परिणाम म्हणून बँकेने आपली वसुलीची परंपरा कायम राखत यावर्षीही शेती कर्जाची ९७ टक्के वसुली करून राज्यात विक्रम प्रस्थापित केला आहे.

कोरोनाच्या प्रादुर्भावामुळे रिझर्व्ह बँकेच्या निर्णयानुसार पीककर्ज परत फेडीस ३१ ऑगस्टपर्यंत मुदत वाढ दिलेली आहे. जे शेतकरी अद्याप पीक कर्जाची परतफेड करू न शकल्याने नवीन पीककर्ज मिळण्यापासून वंचित राहिलेले आहे, अशा सभासदांनी वाढीव मुदतीचा फायदा घेऊन आपले पीककर्ज भरून शासनाच्या व्याज परतावा व इतर योजनेचा फायदा घ्यावा, असे आवाहन बँकेचे अध्यक्ष आमदार भोसले व मुख्य कार्यकारी अधिकारी डॉ. राजेंद्र सरकाळे यांनी केले आहे. तसेच चालू वसुली हंगामात पीक कर्ज वसुलीसाठी सहकार्य केल्याबद्दल सर्व विकास सेवा संस्थांचे अध्यक्ष, पंचकमिटी सदस्य व सचिव यांचे बँकेच्या वतीने आभार व्यक्त केले आहे.