दुष्काळ निवारणासाठी सातारा जिल्हा बॅंकेचे दोन कोटी 

सातारा : जिल्ह्यातील दुष्काळी तालुक्‍यांबरोबरच या वर्षी पश्‍चिमेकडील अनेक तालुक्‍यांत टंचाई स्थिती तीव्र झाली आहे. टंचाईची तीव्रता कमी करण्यासाठी सातारा जिल्हा मध्यवर्ती सहकारी बॅंकेने दोन कोटी रुपयांची मदत देण्याचा निर्णय घेतला आहे. यातून अकरा तालुक्‍यांतील टंचाईग्रस्त गावांना ३० जूनपर्यंत ७५ टॅंकरद्वारे पाणीपुरवठा केला जाणार आहे, अशी माहिती बॅंकेचे अध्यक्ष आमदार शिवेंद्रसिंहराजे भोसले यांनी दिली. 

राज्यभरात १९७२ पेक्षा गंभीर दुष्काळी परिस्थिती निर्माण झाली आहे. पाण्याची तीव्र टंचाई जाणवत आहे. प्रशासनाकडून मोठ्या प्रमाणात टॅंकरद्वारे पाणीपुरवठा होत आहे. टंचाईची तीव्रता दिवसेंदिवस वाढत असून, टॅंकरच्या मागणीत वाढ होत आहे. या पार्श्‍वभूमीवर सामाजिक बांधिलकीतून सातारा जिल्हा मध्यवर्ती सहकारी बॅंकेने आर्थिक मदतीचा निर्णय घेतला आहे, असे सांगून आमदार भोसले म्हणाले, की बॅंकेने टॅंकरसाठी दोन कोटी रुपयांची मदत जाहीर केली आहे. या मदतीतून बॅंक अकरा तालुक्‍यांतील टंचाईग्रस्त गावांत ७५ टॅंकरद्वारे पाणीपुरवठा करणार आहे. तसेच टंचाईवर मात करण्यासाठी शेतकऱ्यांना शाश्‍वत पर्याय उपलब्ध होण्यासाठी सामूहिक शेततळी उभारणाऱ्या गावांना आर्थिक मदतीचा निर्णय संचालक मंडळाने घेतला आहे. 

या टॅंकर वाटपाचा प्रारंभ शनिवारी बॅंकेचे अध्यक्ष आमदार शिवेंद्रसिंहराजे भोसले यांच्या हस्ते जिल्हा बॅंकेच्या मुख्य कार्यालयासमोर झाला. या वेळी बॅंकेचे उपाध्यक्ष सुनील माने, संचालक प्रकाश बडेकर, कांचन साळुंखे, सुरेखा पाटील, मुख्य कार्यकारी अधिकारी डॉ. राजेंद्र सरकाळे, सरव्यवस्थापक आर. एस. गाढवे, एम. व्ही. जाधव, व्यवस्थापक सुजित शेख, श्‍यामराव गायकवाड आदी उपस्थित होते.