सातारा जिल्ह्यातील सहा धरणांतून विसर्ग कायम

सातारा ः जिल्ह्यातील कोयना, धोम, उरमोडी, कण्हेर, तारळी व धोम-बलकवडी या सहा प्रमुख धरणांतून सलग दुसऱ्या दिवशी धरणातून विसर्ग कायम ठेवण्यात आला. कोयना धरण क्षेत्रात पावसाचा जोर वाढल्याने विसर्गात वाढ करण्यात आली आहे. वीजनिर्मितीच्या दृष्टीने महत्त्वाच्या असलेल्या कोयना धरण क्षेत्रात पावसाचा जोर वाढला आहे. यामुळे बुधवारी (ता. २२) सायकांळी सात वाजता धरणाचे सहा वक्र दरवाजे पाच फुटावरून साडे सहा फुटावर उचलण्यात आले आहेत.

या सहा दरवाज्यांतून ५५ हजार २७७ व पायथा वीज गृहातून २१०० असा एकूण ५७ हजार ३७७ क्युसेक पाण्याचा विसर्ग नदीपात्रात करण्यात येत आहे. यामुळे मुळगाव येथील पूल तिसऱ्यांदा पाण्याखाली गेला आहे. धरण क्षेत्रातील कोयना ८०, नवजा १४१, महाबळेश्र्वर १०६ मिलिमीटर पाऊस झाला आहे. या धरणात १०२.५४ टीएमसी पाणीसाठा झाला आहे.

धोम, उरमोडी, कण्हेर, तारळी व धोम-बलकवडी या पाच धरणांतून पावसाचा विसर्ग कायम असून धोम आणि उरमोडी धरणांतून पाण्याच्या विसर्गात वाढ करण्यात आली आहे. सध्या धोम ६,२८६, कण्हेर २,८३७, उरमोडी १,५९०, धोम-बलकवडी ३,०५४, तारळी १,८४० क्युसेक पाण्याचा विसर्ग केला जात  आहे.   

पावसाचा जोर कमी झाला जिल्ह्यात मंगळवारच्या तुलनेत बुधवारी पावसाचा जोर काहीसा कमी झाला आहे. जिल्ह्यात गुरुवारी (ता. २३) सकाळी आठपर्यंत सरासरीस १३.८३ मिलिमीटर पाऊस झाला आहे. पश्चिमेकडील महाबळेश्वर, जावली, पाटण, सातारा या तालुक्यांत काही ठिकाणी पावसाच्या दमदार सरी झाल्या आहेत. कराड, वाई, खंडाळा, कोरेगाव, खटाव या तालुक्यांत तुरळक पाऊस झाला आहे. माण, फलटण या दुष्काळी तालुक्यांत पावसाची दडी कायम आहे. पश्चिमेकडील तालुक्यात संततधार पावसामुळे पिकांत मोठ्या प्रमाणात तण आले आहे. मात्र, दुष्काळी तालुक्यात पावसाअभावी पिके धोक्यात येऊ लागली आहेत.